ප්‍රධාන ආරාධිත අමුත්තා......

ස්ථානය - ධවල මන්දිරය ,වොෂින්ටන් ඩී.සී. , එක්සත් ජනපදය.

වෙලාව -  පෙ.ව.5.30 ,2013.10.02

----------------------------------------------------------------------------------------

බබා... බලන්නකෝ මේ ටයි එක හොඳද කියලා...

මොකද වදේ මේ උදේ පාන්දර නැගිටගෙන බෙරිහන් දෙන්නේ,තව චුට්ටක් නිදාගමුකෝ....

අනේ බෑ පැටියෝ.....මෙහෙ බලන්නකෝ....

ම්ම්ම්......උදේ පාන්දර නැගිටගෙන මේ කොහෙද දුවන්න හදන්නේ,අද මුකුත් විශේෂ වැඩක් නැහැනේ.අනිත් එක ඔයා ඊයේ රජයත් වහලා දැම්මානේ.....

මේක විශේෂ වැඩක් බබා....මට ලැබිච්ච ආරාධනාවක්....ප්‍රධාන ආරාධිත අමුත්තා විදිහට....

ඉතින් කොහෙද ඔය ඔකේෂන් එක තියෙන්නේ...New yorkවලද...

ම්ම්ම්....එහේනම් නෙවි...ආ...ඔයා වැඩ්ඩී නම් කියමු බලන්න......

එහේනම් ඉතින් Denver වල වෙන්නැති....ඔයාගේ හොදම චක්ගෝලයෝ ඉන්නේ එහෙනේ....අනේ මටනම් බෑ ඔන්න ඕවට එන්න....

ඔයා එන්න ඕන නෑ....කොහොමත් මේකේ ආරාධනාව එවල තියෙන්නේ මට විතරයි...

ඔයාට විතරයි ආරාධනාව????.....කව්ද යකෝ රටේ ලොක්කගේ නෝනව අමතක කරපු ඒ අලුගුත්තෙරුවා....

හා..හා.... තරහ ගන්නෙපා....මේක මේ අපේ රටේ වැඩක් නෙවි....

එහෙනම් කොහේද ඕක තියෙන්නේ...

ශ්‍රී ලංකාවේ ...පැටියෝ....ශ්‍රී ලංකාවේ.....

ඉතින් මාවත් දාලා ලෝකේවටේ භාගයක් දුර යන්න තරම් මොකක්ද ඔයාට ලැබිලා තියෙන ඔච්චර මහා ලොකු ආරාධනාව....

ඔන්න ඒකනම් කියන්න බෑ....මං ගිහින් ඇවිත් ඔයාට ඔක්කොම විස්තර කියන්නම්කො...ෆොටෝත් අරන් එන්නම්.....මට පරක්කුවෙනවා.....Air Force One එක මං එනකම් Airport එකේ ස්ටාට් කරගෙන ඉන්නේ...අනේ තරහ නැතුව කියන්නකෝ මේ ටයි එක හොදද කියලා....

බැන්දට පස්සේ මෙච්චර කාලෙකට ඔයා මට නොකියා කොහෙවත් ගියේ නෑ...ඉතින් මේ එකපාරටම මොකක්ද ඔයාට වැහිච්ච මලයකා.....මට කියලා ඕන තැනක යන එකයි ඇත්තේ.....

පැටියෝ....මේ අහන්නකො...ඔයා දන්නවනේ...මට ශ්‍රී ලංකාවේ තියෙන්නේ එච්චර හොඳ ප්‍රතිරූපයක් නෙවිනේ....මේක තමයි මට ඒක වෙනස්කරගන්න තියෙන හොදම අවස්ථාව...ඉතින් ඒකයි මේකට නොයා බැරි.මං මේක ඔයාට කිව්වම ඔයාට කොච්චර වුනත් කට පරිස්සම්කරගන්න බැරුව ඕක කියවාවි ජෙනීත් එක්ක.ඉතින් ජෙනී ඕක කියාවි එයා බැඳලා ඉන්න රුසියන්කාරයට.ඔන්න එතකොට මිනිහගෙන් ඕක දැනගන්නවා රුසියාවේ පුටින්.මිනිහා මට කලින් ඔතනට ගිහිං ඕකේ ක්‍රෙඩිට් එක දාගනියි....

එහෙම වෙන්නේ නෑ....මං කොච්චර දේවල්  ජෙනීත් එක්ක කියවලා තියෙනවද...කෝ මුකුත් ප්‍රශ්නයක් වුනේ නෑනේ අද වෙනකම්....

ඒවයි මේකයි වෙනස්...මේක ගොඩා.....ක් වැදගත් අවස්ථාවක්.....

ඉහි......ඉහි......මට දැන් තේරුම් ගන්න පුළුවන්.ඔයා ඔය යන්න හදන්නේ කොහෙහරි ඉන්න සක්කරවට්ටමක් එක්ක රවුමක් ගහන්න තමයි.ඒකනේ මට කියන්න බැරි කාරණාව.....මං ඒත් සැකකළා.....ඒත් දෙය්යනේ මං හිතුවේ නෑ ඔයා මට මෙහෙම කරාවි කියලා.....මම ඇහැරුණ නිසානේ බොරුවට ටයි එක ගැන ඇහුවේ...නැත්නම් හිමින් සැරේ මාරුවෙලා යන්න තමයි මේ උදේ පාන්දර ලකලහස්තිවෙන්න ඇත්තේ...ඇදගෙන ඉන්නෙත් මනමාලයා වගේ......ශ්‍රී ලංකාවේද හනිමූන් යන්නේ....අනේ මං වගේ කරුමක්කාර ගෑනියෙක්....මං ඒත් හිතුවා....ඊයේ බිල් ක්ලින්ටන් කළා වගේ ආණ්ඩුව වහලා දැම්මා...අද මිනිහව ආදර්සෙට අරන් හොර ගෑනු පස්සේ යනවා...මටයි අර කෙල්ලෝ දෙන්නටයි පාරට බහින්න තමයි වෙන්නේ....ඉහි...ඉහි.....මං අදම යනවා අපේ අම්මලාගේ ගෙදර....තමුසේ ඕන කුදයක් ගහගන්න ඒකයි ඇත්තේ ඕන අම්මණ්ඩියෙක් එක්ක...එතකොට කෙනඩිටයි ක්ලින්ටන්ටයි පස්සේ මහා ඉහළින් නම කියෝගන්න බැරිය...හැබැයි තමුසේ හිතන්නෙපා මං තමුසෙට ලේසියෙන් එහෙම ගැලවිලා යන්න දෙයි කියලා....ඔය හිලරි වගේ නෙවි මම....මොකාවුනත් ඔය අම්මණ්ඩිගේ අඩුවක් දෙකක් කඩලා තමයි මං පස්ස බලන්නේ....

-----------------------------------------------------------------------------------------
නොවැලක්විය පෞද්ගලික හේතුවක් මත මාගේ බ්ලොගයේ 100 වෙනි පෝස්ටුව දියත් කිරීමේ මහා මංගල්‍යට සහභාගීවීමට සිටි ප්‍රධාන ආරාධිත අමුත්තාට එයට සහභාගී නොවිය හැකි බැව් මාවෙත දන්වා ඇත.එනිසා මාගේ 100 වෙනි බ්ලොග් පෝස්ටුවේ ප්‍රීතිය සහෘද ඔබ සැම සමග බෙදාගමි.

ආරාධිත අමුත්තා වෙත වෙන්කොට තිබූ 100 වෙනි Follower ගේ ස්ථානයේ මෙතෙක් අසුන්ගෙන නොසිටින Follower කෙනෙකු අසුන් ගන්නා මෙන් කාරුණිකව ඉල්ලා සිටිමි.

ඔබ සමග එක්ව සිටි වසරක කාලයක් තුරාවට ඔබගේ මුවගට හසරැල්ලක් සහ මනසට දැනුමක් ගෙන ඒමේ මාගේ අදිටන යම් තරමකට හෝ සාර්ථක වී යයි මම සිතමි....ඉදිරියටත් එකිනෙකට වෙනස් බ්ලොග් පොස්ටු සමගින් ඔබ හමුවීමට අදහස් කරමි...එතෙක් ඔබට සැප හා ජය....

මම ඔබේ හිතවත්....

හසරැල්....

ආයෙත් "ඔහේ"ලා හමුවීය ...

අද මට නැවතත් "ඔහේ"ලා හමුවිය.ඒ අවුරුදු 8 කට පමණ පසුය.ඒ මම ආයෙත් ගමරට බලා පැමිණි නිසාය."ඔහේ"ලා හමුවන්නටනම් අපේ පැත්තේම එන්නට ඕනෑය.දැන්නම් ගොඩක් අය මේ කියන්නේ කොහේදැයි දන්නවා ඇත.දන්නැති අයට දැනගන්නට කෙටියෙන්ම කිව්වොත් අපේ ගම මාතරය.

අද බැංකුවට පැමිණි "ඔහේ"ලා මට කටපුරා "ඔහේ" කීවෝය.මමද කටපුරා "ඔහේ"ලාට "ඔහේ" කිව්වෙමි.කොහේ ගියත් මටනම් ගම වගේ හරියන්නේ නැත.පහුගිය දොහේ බ්ලොගේ පාලුවට ගියේද ගමරට බලා එන්නට කදමලු බැන්ද නිසාවෙනි.

රටේ වෙනකොහේදී හරිනම් "ඔහේ"ලාට "ඔහේ" කිව්වොත් අම්බානකට කෑමක් සෙට්වෙන වැඩකි.ඒකනිසා මගේ කට අවුරුදු 8 ක්ම පරිස්සම් කරගැනීමට සිදුවිය.හප්පේ...දැන්නම් ඒ කරදරේ ඉවරය.ඕන කෙනෙක්ට කටපුරා "ඔහේ" කිවහැක.අපිට තාත්තාද "ඔහේ"ය.පන්සලේ හාමුදුරුවෝද "ඔහේ"ය.වෙනකක් තබා පොලිසියේ ලොකු මහත්තයාද "ඔහේ"ය.

"ඔහේ" ගැන කියද්දී කට වැරදී අමාරුවේ වැටුණු අවස්ථා කිහිපයක්ම ඔලුවට නැගේ.ඒත් ඉතින් එකම සිද්දිය බැවින් මෙතන කොටා වැඩක් නැත.රටේ අනිත් පැතිවල මිනිස්සු හිතන්නේ අපි  "ඔහේ" කියා අමතන්නේ ඊලගට පිහියෙන් අනින්න ලේස්තිවෙලා කියලාය.මක්කා වුනත් දැන්නම් ආයෙත් ඒ අමාරුවේ වැටෙන්නේ නැත.

දැන් ඉතින් මක්ක කියන්නේ මක්කටදැයි අහන්නට එපාය.ඔහෙලාට මොකදනම් අපිට මක්කටෙයිය.කවුරු මක්කා කිව්වත් අපේ පැත්තේ  මිනිස්සුන්ගේ පපුව හොදය.හොදට හෝ නරකට කියන්නාක් මූණටම කියති.මටත් මේ පුරුද්ද නිසාම පහුගිය කාලයේ සෑහෙන මට්ටුවෙන්නට විය.ඒත් කොහෙගියත් මාතර ගමේකම රැකිය යුතුය.

ඉතින් මේක කියවන "ඔහේ"ලාට කියන්නට තියෙන්නේ ගමරට බලා පැමිණි බැවින් මගේ අපේ ගම මාතර බ්ලොගේද අළු ගසාබසා දමා තීන්ත ටිකක් ගා කල එලි කරලා නැවත පටන් ගන්නට මං හිතන් ඉන්න බවය."ඔහේ"ලා ඒ පැත්තේ එනවානම් වැඩේ පටන් ගන්නට හැකිය.අතරමග නැවතුනු අනිත් වැඩේ වන weekend project ද ලබන සතියේ සිට පටන් ගැනීමටද සිතා සිටිමි.

එහෙනම් එතකන් "ඔහේ"ලාට ටටාය......

සුබ අළුත් අවුරුද්දක් වේවා !

ලැබුවාවූ සිංහල හින්දු අළුත් අවුරුද්ද 

ඔබ සහ ඔබේ පවුලේ සැමට 

එළකිරි සහ ජලය පිරි 

සතුට සොම්නස සහ ආතල් පිරි

ජල්බරි ,ගුස්ති ,තොප්පි නැති 

පොලුවලින් ලණුවලින් තොර 

සමබර සහ සොමිබර 

ආතල් කිතල් පොල්තෙල් පිරි 

සුබම සුබ අළුත් අවුරුද්දක් වේවා ....!

පින්තුරේ ඉස්සුවේ බුකියෙනි.

බලල ඉවරවෙලා මටත් දෙනවද.....

ඉතින් යාළුවනේ අද ටිකක් වෙනස් දෙයක් ගැන ලියන්න හිතුනා.අපි කාටත් දායකවෙන්න පුළුවන් දෙයක් ගැන.ඒ නිසා මේක කියවලා අමතක කරලා දාන්නේ නැතුව පොඩ්ඩක් ඒ ගැන ක්‍රියාත්මකත් වෙන්න.ඉතින් ඔයාලට අද උනත් දායකවෙලා සතුටුවෙලා පුළුවන් දෙයක් ගැන තමා මේ කියන්නේ.ඒ ඇස් දන්දීම ගැන.

තමන්ගේ මරණින් පස්සේ තමන්ගේ දෙනෙතින් මේ ලෝකේ දකින්න තවත් කෙනෙකුට අවස්ථාව ලබලා දෙන්න පුලුවන්නම් කොච්චර දෙයක් නේද?ඉතින් ලංකාවේ වාසය කරන අපි හැමෝටම ඒ අවස්ථාව ලැබිලා තියෙනවා "ශ්‍රී ලංකා අක්ෂිදාන සංගමය"මගින්.ඔයාලට තියෙන්නේ ඒ අයගෙන් පෝරමයක් අරගෙන පුරවලා තමන්ගේ මරණින් පස්සේ ඇස් දන්දෙන්න කැමැත්ත ප්‍රකාශ කරලා ඒ බව තමන්ගේ ලඟම නෑදෑයෙකුට [සැමියා,බිරිඳ,මව,පියා......] ඒ බව දන්වලා තියන්න විතරයි.

මරණින් පස්සේ නිකම්ම පොලවට පස්වෙලා යනවට වඩා හරි නැත්නම් සෑයක දැවිලා යනවට වඩා හරි මෙහෙම දෙයකට දායකත්වයක් දක්වන්න පුළුවන් එක කොච්චර ලොකු දෙයක්ද.ඇස් ලබාගැනීම ගැන මගේ දැනුම ප්‍රමාණවත් නොවන නිසා ඒ ගැන මං කරුණු දක්වන්නේ නෑ.දැනටත් ලංකාවේ ගොඩ දෙනෙක් මේ කටයුත්තට දායකවෙලා තියෙනවා.විශේෂයෙන්ම අපේ බෞද්ධ යහළුවන්ට කියන්නේ තියෙන්නේ බෞද්ධයන්ගේ අවසාන අරමුණ වන නිවනට යන මගේ එක් පියවරක් වන දාන පාරමිතාව සම්පූරණ කරගන්නත් ඔයාලට ලැබෙන අවස්ථාවක්.ඒ වගේම මේ රටේ විතරක් නොවෙයි සමහරවිට පිටරට කෙනෙකුට පවා පෙනීම ලබාදෙන්න ඔයාලගේ ඇස් දෙකට පුළුවන් වේවි.ඉතින් ඔන්න මං පල්ලෙහායින් දානවා එයාලගේ විස්තර ලබාගන්න පුළුවන් තැන්.

ඉතින් ආයෙත් කියන්න තියෙන්නේ මේ පොස්ටුව බලලා ඉවරවෙලා අමතක කරලා දාන්නේ නැතුව ඔයාලටත් පුලුවන්නම් මේ කටයුත්තට දායක වෙන්න කියලයි.

ඔවුන්ගේ ලිපිනය 

Sri Lanka Eye Donation Society
Dr. Hudson Silva Eye Donation Head Quarters
120/12, Vidya Mawatha, Colombo 07, Sri Lanka 

දුරකථන අංක  0094 11 2698040, 2698041, 2698043 

ෆැක්ස් : 0094 11 2698042 

විද්‍යුත් තැපෑල : sleds@dialogsl.net
ඔවුන්ගේ වෙබ් අඩවිය   http://www.eyedonation.slt.lk

ඔවුන්ගේ මූණුපොතේ පිටුව http://www.facebook.com/sleyedonation

විකිපීඩියා විස්තරය http://en.wikipedia.org/wiki/Sri_Lanka_Eye_Donation_Society

මෙන්න මේ වීඩියෝවත් බලලා යන්න අමතක කරන්න එපා...... 

ලොකු වුනාම කවුරු වෙන්නද හීන මැව්වේ ....

පුංචි කාලේ අපි කාටත් පොඩි හරි හීනයක්‌ තිබ්බා නේද මං ලොකු වුනාම මෙහෙම කෙනෙක් වෙනවා කියලා.අම්මලාටත් හීන තියෙන්නැති අපි ගැන.ලොකු වුනාම මගේ දරුවා මේ වගේ කෙනෙක් වෙයි කියලා.දැන් කාලේ අම්මලානම් දරුවෝ ලොකුවුනාම දොස්තර කෙනෙක් හරි ඉංජිනේරුවෙක් හරි කරන්න තමයි බලාපොරොත්තුවෙන්නේ.ඒකෙ වරද්දකුත් කියන්න බෑ.මොකද දැන් කාලේ තියෙන ආර්ථිකේ හැටියට එහෙම කෙනෙක් නොවී ජීවිතේ ගොඩනගාගන්න සෑහෙන අමාරුයි.ඒ වගේම තමයි අම්මලා තාත්තලා කැමති තමන්ගේ දරුවෝ තමන්ට වඩා පොඩ්ඩක් හරි ඉහල රස්සාවක් කරන එකට.ඒ වගේම දරුවොත් කැමති තමන්ගේ අම්මලා තාත්තලා කරන රැකියාවක යෙදෙන්නත්.

ඉතින් මං අද ලියන්න හිතුවේ ඒ ගැන.මටත් ඒ වගේ හීන කීපයක්ම  තිබුනා පොඩි කාලේදී.ම්ම්ම්....මොනවද ඒ...

1 . කෝච්චි රියදුරෙක් 

ඔන්න දැන් සමහර අය හිනාවෙනවා ඇති නේද.ඒත් සිරාවටම පොඩි කාලේ ඉදලා මට මාර කෝච්චි පිස්සුවක් තිබුනේ.කෝච්චියක ඩ්‍රයිවර් කෙනෙක් වෙන්න ඇත්නම් කියලා ඒ කාලේ හිතුනා.සමහර විට ඒකට හේතුවෙන්න ඇත්තේ අධික වේගය හා කෝච්චිය කිසිම වාහනයකට දෙවැනි වෙන්නේ නැති නිසා වෙන්න ඇති.කොහොමවුනත් ලොකුවෙනකොට ඒ ආසාව නිකම්ම නැතිවෙලා ගියා..

2 . ගුරුවරයෙක්

මගේ අම්මා ගුරුවරියක් වුනු නිසා වෙන්න ඇති.කොහොම වුනත් අදටත් මං වෙන්න ආසම පුද්ගලයෙක්.උසස්පෙළ ඉවරවෙලා පොඩි කාලයක්නම් ටියුෂන් කළා.හැබැයි මං ආසාකලේ දුෂ්කර පලාතක පොඩි ඉස්කෝලෙක ගුරුවරයෙක් වෙන්න.මං බුත්තල හිටපු කාලේ එවැනි ගුරුවරු විදපු දුක දැක්කා.

3 . පත්තරකාරයෙක්

ඒ කියන්නේ මාධ්‍යවේදියෙක්.ඒ වුනාට මට හිතෙන්නේ ඒකෙ නියම වචනය පත්තරකාරයෙක් කියලා.[අපේ නලින් අය්යලා අමනාප නොවේවා]සමහරවිට ඒකෙන් කරන්නපුලුවන් වැඩේ නිසාත් රැකියාවේ යම් නිදහසක් තියෙන නිසාත් වෙන්න පුළුවන්.ඒ හීනෙත් කාලෙත් එකක්ම නැතිවෙලා ගියා.පොඩි කාලෙනම් පත්තර එකකට දෙකකට ලියලා තියෙනවා.

4 . සිවිල් ඉංජිනේරුවෙක් 

මගේ හීන අතුරින් මං වඩාත්ම ලගාවුණු තැන කියන්න පුළුවන්.ඒත් ඉතින් ලංකාවේ විභාග ක්‍රමයට පින්සිද්දවෙන්න ඒ හීනෙත් බොඳ වුනා.මං ඒ ගැන වැඩිය කතාකරන්න කැමති නෑ....ඒ ගැන දන්නෝ දනිති.[2005 උසස්පෙළ රසායන විද්‍යා  ප්‍රතිපල අවුල] 

5 . සංචාරකයෙක් 

මගේ හීන අතුරින් ඉටුකරගන්න තවමත් පරක්කු නැති එකම හීනය.හැබැයි මං මේ සංචාරකයෙක් කියන්නේ ඉදලා හිටලා ට්‍රිප් එකක් යන එකට නම් නෙමෙයි.ලෝකේ පුරා ඇවිදලා විවිදාකාර මිනිස්සු හම්බුවෙලා ඒ ඒ සංස්කෘති අත්විදලා සංචාරය කරන එකට.ලෝකේ පුරා ඒ වගේ අය ඉන්නවනේ.දැනට තියෙන බැදීම් අඩු ජීවිතෙත් ඒකට රුකුලක් වේවි.දැන් වුනත් ඉඩක් ලැබුනුවෙලාවට තනියම රටතොට ඇවිදින්නත් මං අමතක කරන්නේ නෑ...

ඉතින් ඔය මොන මොන හීන තිබුනත් අද මං බැංකුවකට වෙලා බැංකු නිලධාරියෙක් විධියට සේවය කරනවා.ඉතින් ඒ වගේ හැබෑ කරගන්න බැරිවුණු හීන ඔයාලටත් ඇති.ඉතින් පුලුවන්නම් ඒ ගැන පොඩි සටහනක් දාලා යන්න.....

අර්ධ ශතකය සමගින් දන්නා කෙනෙක් ගැන නොදන්නා දේවල්

පින්තුරය ගත්තේ - http://reflectionscenter.com

ඔන්න යාලුවනේ එහෙනම් හසරැල්ලක් බ්ලොගේ 50 වෙනි පියවරට පැමිණි ඔයාලව සාදරයෙන් පිලිගන්නවා.ඇත්තටම මටත් හිතාගන්න බැහැ පොස්ට් 50 ක් මේ තරම් ඉක්මනට දැම්මද කියලා.අවුරදු 2 ක් 3 ක් විතර බ්ලොග් කියෙව්වට පස්සේ මේ බ්ලොග් එක මං පටන්ගත්තේ 2011 දී වුනත් එක පොස්ට් එකකට විතරක් සීමාවුණා.වැඩේ හරියටම නැගලා යන්න ගත්තේ 2012 නොවැම්බර් වලදී මං තවත් බ්ලොග් එකක් වුනු අපේ ගම මාතර පටන් ගත්තට පස්සේ. ඊට පස්සේ ඒ බ්ලොග් එක ලියන වැඩේ අතරමග නැවතුනත් මගේ ප්‍රධාන බ්ලොග් එක වුනු මේක දිගින් දිගටම ලියවුනා.ඉතින් කොහොමහරි මාස 3 කින් විතර පොස්ට් 50 ක් දාන්න පුළුවන් වුනා කියන්නේ මටනම් ලොකු ජයග්‍රහණයක්‌..මොකද මං මේ පොස්ට් කොටන්නේ හවස වැඩ ඇරිලා ඇවිත් ගෙවෙන පැය කිහිපයේදී.

බ්ලොග් එක ගැන කියද්දී මං මේ දේනම් අනිවාර්යෙන්ම සදහන් කරන්න ඕන.ජීවිතේ ප්‍රශ්න ගොඩකින් හෙම්බත් වෙලා හිටපු කාලෙක පටන් ගත්තු මේ බ්ලොග් එකනිසා මට ජීවිතේ දිහා අලුත් විදිහකට බලන්න පුළුවන් වුනා.ඒක තමයි මං මේ බ්ලොග් ලියවිල්ලෙන් ලබපු ලොකුම දේ.ඒ වගේම ඔයාලට මගේ බ්ලොග් එක කියෙව්වොත් දකින්න පුළුවන් මං ගොඩක් පොස්ට් ලියලා තියෙන්නේ අතීත සැමරුම් ගැන කියලා.ඒකට හේතුවෙන්න ඇත්තේ මට හොද වර්තමානයක් නොතිබුනාට ලස්සන අතීතයක් තිබුණු නිසා වෙන්න ඇති.ඇත්තටම ඒ ලස්සන ළමා කාලයට වගේම ඉස්කෝලේ කාලෙටත් මං දැනුත් හිතින් ගමන් කරනවා.

ඒ වගේම මං මගේ බ්ලොග් එක "හසරැල්ලක්" කියලා නම් කරන්න වුනු හේතුවත් කිව්වනම් හොදයි කියලා හිතෙනවා.මගේ නමේ මැද කොටස තමයි හසරැල් කියන්නේ. මගේ අම්මා තමයි මට නම දාලා තියෙන්නේ.ඒත් ජීවිතේ හසරැල්ල අඩුවෙන්ම තිබුණු කාලයක් නිසා වෙන්න ඇති මටත් නොදැනීම බ්ලොග් ඒකෙ නම "හසරැල්ලක්" වුනේ.අනිත් එක මං විශ්වාසකරන දෙයක් තමා අපිට තවත් කෙනෙකුට නොමිලේම දෙන්න පුළුවන් හොදම සංග්‍රහය තමා හසරැල්ලක් කියන්නේ.ලෝකේ ගොඩ දෙනෙක් පිළිගන්න කාරණයක් තමා ලංකාවේ මිනිස්සු ලෝකේ වෙනත් රටවල මිනිස්සුන්ට වඩා සිනහසෙන කොටසක් බව.බ්ලොග් එකේ නම තියෙන බැනර් එක හදලා දුන්නේ මගේ අය්යා.ඒ වගේම මගේ අක්කත් බ්ලොග් එකක් ලියනවා.සමහරවිට ඔයාලා එයාගේ බ්ලොග් එකත් කියවලා ඇති කියලා මං හිතනවා.

මේ බ්ලොග් කෙරුවාවේදී මං ආසාවෙන්ම කරපු වැඩක් තමා weekend project එක.පොඩි කාලේදී අපි හදපු කියපුවා අපේ පොඩි උන්ටත් බලාගන්න පුළුවන් විදිහට බ්ලොග් අවකාශේ සටහන් කරන්න පුළුවන් වුනු එක මට ගොඩක්ම සතුටු කාරණයක්.දැනට වැඩේ පොඩ්ඩක් නැවතිලා තියෙන්නේ නිර්මානවලට ඕන අමුද්‍රව්‍ය සොයාගන්න අපහසු නිසා.මගේ බලාපොරොත්තුව වන ගමට ස්ථාන මාරුවක් ලැබුනොත් නම් වැඩේ ආයෙත් පටන්ගන්න පුළුවන්.ඒ වගේම මගේ රාජකාරි ක්ෂේත්‍රය වන බැංකු වැඩ ගැන බැංකුවයි ඔබයි පාඩම් මාලාවෙන් ගොඩ දෙනෙක් නොදන්නා කරුණු දැනගෙන තිබුනා ඒකත් මට සතුටක්.

ඒ වගේම කියන්න ඕන දැනට නැවතිලා තියෙන අපේ ගම මාතර බ්ලොග් එකත් ගමට ස්ථාන මාරුවක් ලැබුනොත් නැවත පටන්ගන්න බව.එතෙක් මාතරවාසීන් ඇතුළු සියලු බ්ලොග්වාසීන් කමත්වා.තවත් පොඩි දෙයක් කියන්න ඕන මං සමහරවෙලාවට පොඩි පොඩි දේවල් ගැන මට හිතෙන විදිහට මගේ විචාර දානවා.ඒවායේ මටත් නොදැනීම දේශපාලන සිද්දීන් සම්බන්ධවෙලා තියෙන්න පුළුවන්.ඒත් දේශපාලනය කියන්නේ මං අකමැතිම මාතෘකාවක්.ඒවාට ඔයාලා දාන කොමෙන්ට් වලට සමහරවෙලාවට මං අදහස් ප්‍රකාශ නොකරන්නේ ඒකයි.

අනිත් එක මං අවස්ථාව තිබුනත් රාජකාරි වෙලාවේදී ප්‍රතිපත්තියක් විදිහට අන්තර්ජාලයට පිවිසෙන්නේ නැහැ.ඒ නිසා රෑ වෙලා දාන පොස්ට්වලට ඔයාල දාන කොමෙන්ට් වලට මං උත්තර නොදෙන්න පුළුවන්.කොහොමවුනත් මේ කාලසීමාව තුලදී මගේ බ්ලොග් එකට පිවිසුණු.ලිපි කියවපු,අදහස් දක්වපු ඔයාල ඔක්කොටම ස්තුතියි.මගේ බ්ලොග් එකේ මුණු පොතේ පිටුවට මෙතනින් ගිහිල්ලා එකතු වුනොත් මං ලිපි පලකලාම මුණු පොතෙනුත් ඔයාලට ඔත්තුවක් ලැබෙයි.මං ගොඩක් අයගේ බ්ලොග් කියෙව්වත් කොමෙන්ට් කරන්නේ සමහරවෙලාවට විතරයි.ඒ මට තියෙන සීමිත කාලසීමාව නිසා හොදේ.ඒ වගේම මගේ බ්ලොග් අඩවිය සින්ඩිකේටර වලට ඇතුළු කරගෙන උදව්කල ඒවායේ හිමිකරුවන්ටත් මං මේ වෙලාවේ ස්තුතිවන්ත වෙනවා.

අර්ධ ශතකය ගහපුවෙලේ නිකම්ම අවුට් වෙලා යන්න හොද නැතිනිසා පින්තුර ටිකකුත් එක්ක ඔයාල සමහරවිට දන්නා කෙනෙක් ගැන නොදන්නා කරුණු ටිකක් දාන්න හිතුවා.ඔන්න එහෙනම් බලමුකෝ ......

Nike සමාගමේ මැලේසියාවේ කර්මාන්ත ශාලාවේ සියලුම සේවකයින් වසරක් තුලදී ලබන ආදායමේ එකතුවට වඩා වැඩි මුදලක් Nike සමාගම විසින් Micheal Jordan ට ගෙවනවා.

Adolf Hitler ලැබෙන්න සිටි අවස්ථාවේදී ඔහුගේ මව ගබ්සාවකට සුදානම් වුවත් එය වලක්වා ඇත්තේ ඇයගේ දොස්තර විසින්.

සුප්‍රසිද්ධ micky mouse නිර්මාණය කල Walt disney මීයන්ට අධික ලෙස බිය දක්වුවෙක්.

Ernest Vincent Wright නමැති මේ ලේඛකයා Gadsby නමින් පොතක් ලියා තිබෙනවා.එහි ඇතුලත් වචන 50000 න් කිසිම වචනයක E අක්ෂරය සදහන්වෙන්නේ නැහැ.

virginiya woolf තමන්ගේ සියලුම පොත් ලියා ඇත්තේ සිටගෙනයි.

albert einstein ට වයස අවුරුදු 9 ක් වනතුරුත් හරිහැටි කතාකරගනීමට බැරිව තිබෙනවා.ඔහුගේ මව්පියන් සිතා ඇත්තේ ඔහුට මානසික අපොහොසත් බවක් ඇති කියල..

kermit කියන රූකඩ ගෙම්බා වමත්කාරයෙක්.

Donald Duck නමේ මැද කොටස තමයි Fauntleroy කියන්නේ.

Napolean තමන්ගේ යුද්ධ සැලසුම් කරලා තියෙන්නේ වැලි පිල්ලක.    [ඒ කියන්නේ වැලි අතුරපු පෙට්ටියක]

Marilyn Monroe ගේ කකුලක ඇඟිලි 6 ක් තිබිලා තියෙනවා.

එහෙනම් ටටා බයි බායි.....

ප.ලි.-පස්සේ කාලෙක අපේ ගම මාතර බ්ලොග් එකේ පොස්ට් ආනයනය කළනිසා මේක 50 වෙනි පොස්ට් එක විදිහට පෙන්නන්නේ නෑ.ඒත් මේක තමයි මේ බ්ලොග් එකේ 50 වෙනි පොස්ට් එක 

2012 ටටා බයි බායි

2011 වසරේ ආරම්භ කලාට එක ලිපියක් විතරක් ලියපු බ්ලොග් එක මේ 2012 අවුරුද්දේ ඔක්තෝබර් අග නැවත පටන්ගන්න හිතුවා ,මේ මාස දෙකට දැනට 

ලිපි - 23 ක් 

හිට්ස්  - 2047 ක් 

කොමෙන්ට්ස් - 175 ක් (මගේ කොමෙන්ට් ඇතුළුව )

ෆලෝවර්ස්ලා - 32 ක් 

යාළුවො - ගොඩක් 

දැනුම  - හුගක් 

සිනාවන් - කප්පරක් 

බ්ලොග් අවකාශේ නිසා ලැබුනා ,එළබෙන 2013 අවුරුද්දේ මගේ ලොකුම බලාපොරොත්තුව තමා ස්ථාන මාරුවක් අරගෙන ගමට යන එක ,එහෙනම් එළබෙන 2013 අවුරුද්ද බ්ලොග් අවකාශේ ඔබ සැමටමත් ලෝක වාසී සියලු ජනතාවටත් සැපෙන් සෞභාග්යෙන් පිරි සිරි

සුබ නව වසරක් වේවා !

මං හසරැල්ලක් සහ අපේ ගම මාතර ලියන හසරැල්