Friday, November 30, 2012

අලුත් මාතර

ඔන්න කාලෙකට පස්සේ අද ගමේ ගියා ,ඒ යන ගමන් අලුත් උනු මාතර නගරේ ෆොටෝ කෑලි ටිකකුත් ගත්තා ,බයිසිකලේ යන ගමන් නිසාත් හවස නිසාත් ෆොටෝ වල පැහැදිලි කම මදි ,ඒ ගැන කමා කරත්වා ,දේශ දීපන්කරවල ඉන්න අපේ ඇත්තන්ට බලාගන්නත් එක්ක තමයි මේ ටික දාන්නේ .




නුපේ හන්දිය 


බ්‍රෝඩ්වේ පාර 


තේක්ක ගහ ගාව 
(@ සයුරි  - තේක්ක ගහනම් කපලා ඔන්න )


යෝදයගේ බයිසිකලේ 


 මහානාම පාලම 


මහානාම පාලම


මේක දැක්කගමන් මතක් උනේ මොකක්ද ?


මේක නේද?මේ නම් මාතර නෙමෙයි ,


මේ නම් මාතර වෙරල උද්‍යානය 


පරෙවි දූවේ පාලම 


පරෙවි දූව 


මාතර වෙරල උද්‍යානය 


වීදි ලාම්පු 


සුනාමි ස්මාරකය 


බ්‍රෝඩ්වේ ෆිල්ම් හෝල් එක (දැන්නම් කාර්ගිල්ස් එක වෙලා )

ගෙහුං එන්නං 

Wednesday, November 28, 2012

හැට්ටේ අස්සේ

මාතෘකාව දැක්ක ගමන් හිතුන දේ වැරදියි ,මේක මේ පොඩි රස කතාවක් ,හැබැයි ඇත්ත කතාවක හරිය.

මේ සිද්දිය උනේ අපේ ඔෆිස් එකේ ක්ලීනින්ග් වැඩ කරන සුනිල් අය්යට ,මිනිහගේ ටිකක් කන ඇහෙනවා අඩුයි ,ඉතින් කන ඇහෙනවා අඩු අය ටිකක් හය්යෙන් කතා කරන බවත් කියන්න ඕන නෑනේ ,

ඔන්න දවසක් අපේ සුනිල් අය්යට ගෙදර ඉන්න එයාගේ නෝනාගෙන් කෝල් එකක් ආවා ,එදා හැබැයි අපේ ඔෆිස් එකේ දුරකථන ජාලය (ඒ කියන්නේ intercom එක) බිඳවැටිලා තිබුනේ ,ඉතින් කෝල් ආන්සර් කරන්න නම් ඉස්සරහ ප්‍රධාන දුරකථනය ලගටම එන්න වෙනවා ,ඔන්න ඒ විදියට සුනිල් ඇවිත් කෝල් එක ගත්තා ,

දැන් ටිකක් සද්දෙට මෙන්න මෙහෙම කතාව යනවා ,බැංකුවේ ඉස්සරහ කවුන්ටරේ ගාව නිසා සෙනග එහෙමත් ඉන්නවා ,කතාවේ අපිට ඇහෙන්නේ එක පැත්තක කතාකරන ඒවා විතරනේ ,ඔන්න මෙහෙමයි කතාව .

සුනිල් - හලෝ 

නෝනා -~!@#$$$#^&*%$@#$%$@%

සුනිල් -මොකටද සල්ලි 

නෝනා - !~!@!#@%$$^$%@#!#

සුනිල් -කීයක්ද ?

නෝනා -~!!#$@$%$^&&*^*&#!#@$

සුනිල් - මොනවා... සල්ලි නැහැ 

නෝනා - #@@$%$%&*^*@!#$#

සුනිල් -ඇයි ඕයි මං අද උදේ බලනකොටත් හැට්ටේ අස්සේ තිබුනේ ...


Tuesday, November 27, 2012

අන්න මැනේජර් ඔයාලට යන්න කිව්වා


මේකත් මං ජොබ් එකට ගියපු මුල් දවස්වල උනු දෙයක් ,මං කලිනුත් කිව්වා වගේ මට මුලින්ම ජොබ් එක ලැබුනේ බුත්තලටනේ ,

මාත් එක්ක එතකොට තවත් එක යාළුවයි සම වයසේ හිටියේ ,ඉතින් අපි දෙන්නම බොහෝ වෙලාවට එක ලග තමයි වැඩ කලෙත් ,දවසක් බැංකුව  3 ට වැහුවට පස්සේ අපි ඉතින් පොඩි චැට් එකක් දාගෙන හිටියා ,

වැඩට ගියපු අලුත නිසා කෙනෙක් වැඩක් පැවරුවොත් විතරයි අපිට වැඩ තිබුනේ ,වැඩක් හොයල බලල කරන්න තරම් දැනුමක් එතකොට නොතිබූ නිසා ,ඔන්න ඔහොම ඉන්නකොට එක පාරටම අපේ පියන් (ඒ කියන්නේ  කා.කා.ස )ගුණතිලක ඇවිත් කිව්වා 

"අන්න මහත්තයලට ලොකු මහත්තයා යන්න කිව්වා "

එහෙම කියලා මිනිහා යන්න ගියා ,ඉතින් මං අනිත් එකාට කිව්වා "මචන් අද ඒ හැටි වැඩත් නෑනේ ,ඒක හින්ද වෙන්නැති " කියලා ,එහෙම කියලා අපි දෙන්නා පොතත් අත්සන් කරලා එලියට බැස්සා ,

චමරියට යන ගමන් කඩේකට ගිහින් තේ එකක් කාරිය බීල හිමින් සැරේ චමරියට ගියා ,ඔහොම ගිහින් විනාඩි 15 ක් විතර යන්නැති ,මෙන්න එකපාරටම අපේ පියන් ගුණතිලක එනවා බයිසිකලෙත් පැදගෙන යකා වගේ ,

ගුණතිලක - කොහෙද ගියේ ,මං ටවුන් ඒක පුරාම හෙව්වා ,වැඩ ඉවර වෙන්න කලින් ගියා කියල අන්න ලොකු මහත්තයට හොදටම තදවෙලා ,ඒ මදිවට පොතත් අත්සන් කරලා ,

අපි -ඉතින් ඔයාමනේ කිව්වේ අපිට යන්න කිව්වා කියලා ,

ඔන්න ඒ පාර ඉතින් මිනිහා උඩ බිම බලන්න ගත්තා ,

ගුණතිලක -ඔව් ,ඉතින් යන්න කිව්වා තමයි ,යන්න කිව්වම ඒක අහන්නේ නැතුව චමරියට ආවේ ඇයි .

අපි -යන්න කිව්වම යනවා ඇර ඉන්නේ මොන ලෝකෙද ඕයි ,

ඔහොම කතාකරගෙන යනකොට  තමයි අපිට තේරුම ගියේ වචනවල පටලැවිල්ල,මොකද දන්නවද වෙලා තිබුනේ ,ඒ පැත්තේ කෙනෙක් තවත් කෙනෙකුට එන්න කියලා වෙනත් කෙනෙක් අතේ පණිවිඩයක් යැව්වොත් ඒ එක්කෙනා ගිහිල්ලා පණිවිඩේ දෙන්නේ "ආන්න අහවලා ඔයාලට යන්න (ඒ කියන්නේ එන්න )කිව්වා කියලා ,

ඇත්තටම වෙලා තිබුනේ ඒ වෙලාවේ මැනේජර් අපිට එයා ලගට එන්න කියපු එක,ඉතින් පියන් පණිවිඩේ ඇවිත් අපිට දුන්නේ අර විදිහට ,එතකොට බලාගෙන ගියාම මිනිහත් හරි ,අපිත් හරි.

කොහොම උනත් මේ වචන පටලැවිල්ල මැනේජර්ට තේරුම් කරලා දුන්නම අවුලක් උනේ නැහැ ,අපිටත් වෙන වැඩ .

පින්තුරේ ගත්තේ http://cobaltpm.com

Monday, November 26, 2012

ඇත්තටම සතුට තියෙන්නේ කොහෙද ?


මේක මං හැමදාම මගෙන් අහන ප්‍රශ්නයක් ,ඒත් අද වෙනකම් හරි උත්තරයක්‌ හොයාගන්න මට බැරිඋනා ,ඔයාලා දන්නවද ඇත්තටම සතුට තියෙන්නේ කොහෙද කියලා නැත්නම් සතුට රදාපවතින්නේ මොනවා මතද කියලා ,

ඔයාල හිතන දේ කොමෙන්ට් කරලා යන්න ,

ඇත්තටම සතුට තියෙන්නේ කොහෙද ?

Thursday, November 22, 2012

මහා රෑ ආ මාරයා - අපිට කොටි ගහපු හැටි 3


පලවෙනි කොටසට  සහ දෙවැනි කොටසට මෙතනින් යන්න ,

එදා හවස 3 පමණ වනවිට කවදාවත් නැති තරමට නගරය ජනී ජනයාගෙන් තොර පාලු ස්ථානයක් බවට පත්වුණා ,ඉඩ හිට හෝ දකින්න ලැබුනේ වේගයෙන් එහා මෙහා යන මාධ්‍ය ආයතනයක වාහනයක් පමණයි ,අපට රෑ කෑම ගෙනෙන ගෙදරිනුත් එදා  නොපැමිණෙන බව ඉර හඳ වගේ විස්වාස නිසා අපි රෑ කෑමට හදාගැනීමට මැගී නූඩ්ල්ස් පැකට් ටිකකුත් අරගෙන වේලාසනින් චමරියට ගියා .

අපේ බැංකුවේ චමරිය තිබුනේ බුත්තල -  මාලිගාවිල පාරේ නගරයේ සිට ටික දුරකින් ,මේ පාරේම තව ටික දුරකින් තමයි බස් රථයට බෝම්බ ගසා තිබුනේ .ඒ වගේම අපේ චමරිය තිබුණු ඉඩම අක්කර 5 ක පමණ ඉතා විශාල ඉඩමක් ,ඒ නිසා සෑහෙන දුරක් යනතුරු දෙපසින්ම ගෙවල් තිබුනේ නැහැ .

මේ වෙනකොට අපේ චමරියේ සිටියේ මා සමග මගේ තවත් බැචාලා දෙන්නෙක් ,ඔවුන් අමල්  සහ බිමල් යයි සිතමු (නියම නම් නොවේ ) ,අපි තුන්දෙනා රෑ බෝ වී ගෙන එන විට ගෙන ආ මැගී නූඩ්ල්ස් ටිකත් හදාගෙන කාලා රූපවාහිනිය නරඹන්න පටන් ගත්තා .එදා ඉතින් වෙනත් දෙයක් බලන්න තිබුනේ නැහැ ,ත්‍රස්ත ප්‍රහාරය ගැනම තමයි ,

මේ වනවිටත් විශේෂ බලකාය මගින් පැනගිය ත්‍රස්තයන් සොයා සිදුකල සෝදිසි මෙහෙයුම් දියත්ව තිබුනා ,විටින් විට යාල දෙසින් වෙඩි ශබ්ද පවා ඇසුනා .ටික වෙලාවක් රූපවාහිනිය නැරඹු අපි එකිනෙකාට සුබ රාත්‍රියක් පතා තම තමන්ගේ කාමරවලට ගියා .

මගේ කාමරය තිබුනේ චමරියේ පිටතින් ඇතුල් විය හැකි ආකාරයට ,මම කාමරයට ගොස් ටික වෙලාවකින්ම මට හොද නින්දක් ලැබුනා ,එක් වරම මං ඇහැරුනේ මගේ ඇදුම් අල්මාරිය අසලින් ආපු ශබ්දයකින් .වෙලාව රෑ එ‍කට විතර ඇති 

ක්රීස් .......ක්රීස් .......ක්රීස් .....

අපිට දී තිබුනේ වානේ වලින් තැනු ඇදුම් කබඩ් ,මං ඇදෙන් නැගිට ගොස් අතෙන් හය්යෙන් කබඩ් ඒකට තට්ටු කළා ,

දඩාස් ............දඩාස් ..............

ආයිත් ඇදට ඇවිත් නිදාගන්න හැදුවත් ආයෙත් අර ශබ්දය.ඒ පාර මම පහතට නැවී අල්මාරිය යට පරීක්ෂා කරලා බැලුවා ,ආ .....මේ පොල් කුරුමිනියෙක්නේ ,මං කොස්ස ගෙන පොල් කුරුමිණියා එලියට ගත්තා ,කොස්සෙන්ම කුරුමිණියා තල්ලු කරගෙන එලියට බහින දොර ගාවට ගියා ,දොර ඇරියා ... කරාස් ....මේ දොර කොහොමත් ටිකක් හිරයි,කුරුමිණියා එලියට දැම්මා දොර වැහුවා ,ආයෙත් ඇවිත් නින්ද නොයන නිසා සද්දේ අඩුවෙන් රේඩියෝව දාගෙන ඇදට වෙලා හිටියා ,ඔහොම මට නින්ද යන්න ඇති ,

මං ආයෙත් ඇහැරුනේ මගේ හෑන්ඩ් ෆෝන් එක නාදවීම නිසයි ,වෙලාව පාන්දර 3 ට විතර ඇති ,කතාකලේ මගේ හොද මිත්‍රයෙක් වන අපේ බැංකුවේ වැල්ලවාය ශාකාවේ මැනේජර් මහතාගේ ලොකු පුතා ,ඔහු චරිත්

චරිත් - මචන් දැන් කවුද උබලගේ චමරියට ආවේ ,

මං - මොකක් 

චරිත් - දැන් අමල් අපේ ගෙදරට කෝල් එකක් අරන් තිබුනා කොටි ඇවිල්ල කියලා ,මේ අපි එන්න හදන්නේ ,

මං -උබට පිස්සුද බන්,ඉදපන් බලන්න මේ අමලයා කොහෙද කියලා .

මං අනිත් දොර අරගෙන අමල්ගේ කාමරේට ගියා ,එහි අමල් හිටියේ නැහැ .ඔන්න දැන්නම් මාත් ටිකක් ඩිම් උනා ,

මං -යකෝ ,මුන් නැහැනේ ,මාවත් දාල මේ මහා රෑ මුන් කොහෙද ගියේ ,

මට බයකට වඩා දැනුනේ තරහක් ,මම කෝල් එක කට් කරලා මහා හය්යෙන් කෑගැහුවා ,අමාල් ................අමාල්................

මෙන්න මූ එනවා ඇද යටින් එලියට ,ගැහි ගැහි ,

අමල් - මචන් උන් උබට මුකුත් කලේ නැද්ද ?

මං - කවුද යකෝ 

අමල් - කොටි 

මට දැන් යක්ස කේන්තියක් ආවත් බයේ වෙව්ලන අමල් දැක්කම ඒක නිකම්ම නිවිලා ගියා ,මං වතුර බෝතලයක් අරගෙන ඌට බොන්න දුන්නා ,

මං -දැන් කියපන් මොකද උනේ කියලා ,

අමල් -මචන් හරියටම එකට විතර උබේ කාමරේ දොරට ගහන සද්දයක් ඇහුනා ,(මං කබඩ් එකට ගහපු සද්දේ )ඊලගට කාමරේ දොර ඇරලා වහනවත් ඇහුනා,ඊලගට කාමරේ කීප දෙනෙක් කතාකරනවත් ඇහුනා ,(මගේ රේඩියෝ එකේ සද්දේ )

මං -ඉතින්  

අමල් - මං හිතුව බන් කොටි ඇවිත් උබව මරලා කියලා 

මං -ඉතින් එච්චරද උබට හිතුනේ 

අමල් - නෑ බන් මට හිතුනා ඊලගට උන් මගේ කාමරේට ඒවි කියලා,ඉතින් මං මැනේජර්ට කෝල් එකක් ගත්තා ,ෆෝන් එක වැඩකලේ නැහැ ,මං R.M.(ප්‍රාදේශීය කළමනාකරු )ට ගත්තා ,සර් 119 ට  කියන්නම් කිව්වා ,ඊලගට මං චරිත්ලයි ගෙදරට ගත්තා ,

මං - ඌ තමයි මට කතාකලේ ,

අමල් -මචන් මං ආර්.එම් සර්ට කිවා උබ මරලා කියලා ,එහෙම නැති නිසා අවුලක් වෙයිද 

මං - අවුලක් වෙයිද ? අනේ උබ මගෙන් අහගන්නෙපා ,දැන් ඉතින් පොලිසියෙන් ඒවිනෙ ,ඉදපං මේ බිමල්ට ඇහැරවන්න 

මං ,බිමල්ගේ කාමරේට ගියා ,මූ හොදටම ගොරව ගොරවා බුදි ,බොහොම අමාරුවෙන් ඌව අහරවගත්තා ,ඌටත් වෙච්ච දේවල් ටික පැහැදිලි කළා ,
මං -දැන් ඉතින් පොලිසියෙන් ආවම කියන්න කතාවක් හදාගමු,අපි කියමු කවුරුහරි දොරට ගහලා දුවලා ගියා කියලා ,අපි බයවෙලා වගේ ඉමු ,

බිමල් - කොහොමද බන් එහෙම ඉන්නේ 

අමල් - මේ මං වගේ ඉදපන් ,හරිද 

මං -එක නෙමයි අමල් මං කලින් කාමරේට ආවම ඇයි උබ කතා කලේ නැත්තේ ,

අමල්- මට නින්ද ගිහින් හිටියේ බන් ඇද යටම ,උබ නම කියලා කෑ ගහන කොටයි මට ඇහැරුනේ 

මං - ඇත්තද ? දැන්වත් ආර් .එම් ටයි චරිත්ටයි කෝල් කරලා වුනු දේ කියමු ,

කොහොම උනත් එලි වෙනකල් හරි එලිවුනාට පස්සේ හරි කවුරුවත් අපිට කොටි ගැහුවද බලන්න ආවේ නැහැ ,ඔන්න ඔහොමයි අපිට කොටි ගැහුවේ ,

මේ සිද්දිය අපේ ප්‍රාදේශීය කළමනාකාර මහතා වෙනත් ශාඛා වලදී පැවසීම නිසා අපිට කොටි ගහපු හැටි ඔක්කොම දැන ගත්තා .දැන් මේ සිද්දිය මතක් වෙනවිට සිනාගියත් වසර ගණනාවක් තිස්සේ මායිම් ගම්මානවල විසු ජනතාවගේ හැගීම් ඔබට තේරුම් ගන්න පුළුවන් වේයැයි
සිතමි.

අර කතාවටත් කියනවනේ කොටින්ට බයේ කැලේ හැංගිලා ඉන්නකොට වාතයක් (ඒ කියන්නේ පඩයක්) යන්න ආවත් ඒක යවන්නේ තුනට කඩලා කියලා .

ගෙහුං එන්නං 

ප.ලි - මේ කතා තව පොස්ට් දෙකතුනක් අතැත් ඕනෑම දෙයක් ඕනවට වඩා ඕන නැති නිසා මේ ලිපි පෙළ මෙතනින් දැනට නවතමි -බලමු ඉස්සරහට හිතුනොත් ඉතිරි ටිකත් දාන්න බැරිය

Wednesday, November 21, 2012

බෆල් රථයේ සිටි සෙබළුන්ගේ ගැලවුම්කාරයා - අපිට කොටි ගහපු හැටි 2



මුල් ලිපිය බැලුවේ නැත්නම් බලලා එන්න,

මේකත් එදාම සිද්ද උනු සිද්දියක් ,හැබැයි මේ සිද්දිය ගොඩ දෙනෙක් නොදන්නා දෙයක් ,එයට මාධ්‍ය මගින් ප්‍රචාරයක් ලබා දුන්නෙත් නැහැ 

බස් රථයට එල්ල උනු ත්‍රස්ත ප්‍රහාරයෙන් අනතුරුව ප්‍රදේශයේ ආරක්ෂාව තහවුරු කිරීම උදෙසා අවට පිහිටි හමුදා කදවුරු වලින් අමතර භටපිරිස් කැදවනු ලැබුවා ,

මේ අතර අපේ බැංකුවේ වෑන් රථයක් කතරගම ශාඛාවේ කටයුත්තක් සදහා උදෑසනින් පිටත්ව ගොස් තිබුනා ,උදෙන්ම පිටත්වූ නිසා සහ දැන් මෙන් දුරකථන පහසුකම් (විශේෂයෙන්ම ඒ කාලයේ යාල ප්‍රදේශය අවට හෑන්ඩ් ෆෝන් වලට සිග්නල් තිබුනේ නැහැ )ව්‍යාප්තව නොතිබූ නිසා රථයේ සිටි රියදුරුට බස් රථයේ සිද්දිය ආරංචි වී තිබුනේ නැහැ ,එමෙන්ම කාගේත් අවදානය බුත්තල -මාලිගාවිල මාර්ගයට යොමුවී තිබුණු නිසා බුත්තල - කතරගම රජ මාවත ගැන කාගේවත් ඇස යොමුවී තිබුනේ නැහැ ,
මේ රථයේ සිටි රියදුරු අය්යා ගැන සටහනක් කල යුතුමයි ,කොහොමත් බැංකුවක සිටින රියදුරන්ගේ රැකියාවේ අවදානම උපරිමයි ,මොකද ගොඩක් වෙලාවට මුදල් ප්‍රවාහන කටයුතු සිද්ද කරන්න වෙන නිසා ,එමෙන්ම නියමිත වේලාවන්ට අදාළ ස්ථානවලට යායුතුත් නිසා වේගයත් අවශ්‍ය කාරණයක් ,මේ නිසා වේගය සහ අවධානය යන දෙකම හොදින් ඇති පුද්ගලයෙකුට පමණයි මේ කාර්යය හොදින් සිදු කරන්න පුළුවන් ,

ඉතින් මේ කියන සියලුම කරුණු වලින් පරිපූර්ණ කෙනෙක් තමයි මේ අපේ සුසිරි (නියම නම නොවේ ,ඔහු කිසිසේත්ම ප්‍රසිද්දියට කැමති පුද්ගලයෙකු නොවේ ,මේ සිද්දිය අපිට කිව්වේ ඒ වෙලාවේ රථයේ සිටි වෙනත් කෙනෙක් ,එය ඇත්තදැයි ඇසුවාම ඔහු මහා හඩින් සිනාසී ඕවත් වැඩද මල්ලි කිව්වා,පුවත්පත්වලින් ඉල්ලු සම්මුක සාකච්චා පවා ඔහු ප්‍රතික්ෂේප කළා, )යකාටවත් බය නැති  ඔහු කිසිදු අවස්තාවක කලබල නොවන කෙනෙක් ,

මං ඒක හොදින් අත්දුටුවේ විටෙක ඔහුත් සමග කොළඹ ගොස් මුදල් ප්‍රවාහන කටයුතු සදහා නැවත එන වෙලාවකයි ,පරක්කු වී කොළඹින් පිටත් උනු අපි නිසි වෙලාවට ශාකාවට යාමට නොහැකි වේ යයි සිතා සිටියත් නියමිත වෙලාවටත් ප්‍රථම අපිව ගමනාන්තයට ගෙන ඒමට ඔහු සමත් උනා ,මං හිතන්නේ ඒ ගමනේදී රථයේ රෝද එතරම් ගෙවෙන්නට නැතිව ඇති ,මොකද අපි ආපු හැටියට රෝද පාරේ ගෑවුනයයි හිතන්නවත් බැරි නිසා ,ආ ... කතාවෙන් පිට ගියානේ ,නැවතත් කතාවට 

ඉතින් ඔන්න සුසිරි තමන්ගේ රථයත් එලවාගෙන බුත්තල හරහා රජ මාවත ඔස්සේ කතරගම බලා ගමන් ගන්නවා ,මගදී කතරගම බලා ගමන් ගැනීමට සිටින ගුරු බවතුන් කිහිප දෙනෙකුත් තමන්ගේ රථයට නංවාගත් ඔහු යාල සීමාවට පිවිසුනා ,

මේ අතර බෆල් රථයකට නැගුනු හමුදා සෙබළු කිහිප දෙනෙක් කතරගම සිට බුත්තල කරා ඒමට පිටත් වී තිබුනා ,අපගේ වෑන් රථය සහ මේ බෆල් රථය දෙපසින් එකිනෙකා කරා ලංවෙමින් සිටියා ,රජ මාවතේ ගල්ගේ ප්‍රදේශයට ලංවෙමින් සිටි සුසිරි දුටුවේ ඉදිරියෙන් පැමිණි බෆල් රථය එක්වරම බෝම්බයකට අසුවී කැලයට ඇදී ගිය අන්දමයි,

හොදින් සූදානම් වී සිටි ත්‍රස්තයන් මේ බෆල් රථයටත් ක්ලේමෝ ප්‍රහාරයක් එල්ලකොට තිබුනා ,මේ අවස්තාව කොතරම් කම්පනකාරී අවස්තාවක් උනත්  සුසිරි මේ කිසිවකින් කලබල උනේ නැහැ ,වහාම වෑන් රථය නැවැත්වූ ඔහු එහි සිටි අනිත් අයගෙත් උදව්වෙන් මියගොස් නොසිටි  සෙබළුන් වෑන් රථයට පටවාගත්තා ,

කැලයේ සැගවී සිටි ත්‍රස්තයන් බලාපොරොත්තු නොවූ අන්දමින් වෙනත් රථයක් පැමිණ හමුදා සෙබළුන් බේරා ගැනීම නිසා ඔවුන්ගේ බලාපොරොත්තු කඩ උනා ,පසුව මාර්ගය අසලට දිව ආ ත්‍රස්තයන් වෙඩි වරුසාවක් එල්ල කරත් ඒ වනවිටත් සුසිරි තමන්ගේ රථයත් සමග ඉගිලී අවසන් ,මෙසේ ඉගිලී ගිය ඔහු සෙල්ල කතරගම ප්‍රදේශයේදී මාර්ග බාධකයක් පවා පෙරලාගෙන ගොස් කෙලින්ම නැවතී තිබුනේ කතරගම රෝහල ඉදිරිපිටයි ,

අපි එදා හවස ඔහු මුණගැසෙන විටත් හැමදාම ඔහුගේ මුවග රැදෙන හසරැල්ල නම් මැකී ගොස් තිබුනේ නැහැ ,ඔහුගේ නොසැලෙන ආත්ම විශ්වාසය සහ වේගය නිසා රටට වටිනා රණවිරු ජීවිත කිහිපයක්ම රැක ගැනීමට හැකිවූවා  ,(දැන්නම් රජ මාවත කාපට් අතුරා සකස් කර තිබුනත් ඒ කාලයේ එය වල ගොඩල් වල එකතුවක් විතරයි )ඔහුගේ චායාරූපයක් මා සතුව පැවතුනත් එය ඔහුගෙන් නොවිමසා  පලකල නොහැකි බැවින් පල නොකරමි ,(ඔහුගෙන් ඇසුවොත් මේ පොස්ටුවත් දාන්න වෙන්නේ නැහැ )

මීලහට ටිකක් රස කතාවක් - මහ රෑ චමරියට කොටි ඇවිත් 

Tuesday, November 20, 2012

අපිට කොටි ගහපු හැටි


පින්තුරේ දැක්ක ගමන් සමහර අයටනම් මතක වෙන්නැති ,මේ තමයි බුත්තල බස් බෝම්බයේ සලරුවක් ,

කාටවත් කරදරයක් නැති අසරණ මිනිසුන් මරාදමා උන් සෙවූ විමුක්තිය කුමක්ද ?මම මේ කාලයේ සේවය කලේ අපේ බැංකුවේ බඩල්කුඹුර ශාඛාවේ ,හැබැයි නැවතිලා හිටියේ බුත්තල ශාඛාවේ චමරියේ ,මාත් සමග මගේ බැචාලා දෙන්නෙකුත් චමරියේ හිටියා ,

මම බොහෝ දිනවල වැඩට යන්නේ මේ බස් එකේ තමයි ,මේ බස් එක දිව්වේ මාලිගාවිල සිට බඩල්කුඹුර දක්වායි,කොහොම උනත් එදා මට ටිකක් කලින් වැඩට යන්න හිතිලා මං බයිසිකලේ ටවුමේ දමලා වෙන බස් එකක වැඩට ගියා ,එහෙම ගිහින් ටික වෙලාවකින් තමයි මේ සෝචනීය පුවත කන වැකුණේ ,සිද්දිය වෙලා තිබුනේ අපේ චමරියේ ඉදලා බොහොම කෙටි දුරකින් ,

කොහොම උනත් එදා ආරක්ෂක තත්වය සලකලා අපි ශාඛාව ටිකක් කලින් වැහුවා ,මං කෙලින්ම ගියේ බුත්තල රෝහලට ,මා සමග වෙනදා බසයේ එකට ගමන්ගත් මිනිසුන්ගේ නිසල සිරුරු දකිනවිට මට දැනුනේ මා සිටගෙන සිටින තැන පොලව ගිලාබසිනවා වැනි හැගීමක් ,

එමෙන්ම ඔවුන් මරාදමා තිබූ කුරිරු ආකාරය මටනම් දිවි ඇතිතෙක් අමතක නොවේවි ,ගොඩ දෙනෙක් නොදන්නවා උනාට මිනිස්සු මැරිලා තිබුනේ බෝම්බෙන් නොවේ ,බෝම්බය අටවා තිබුණු තැන අනුව බෝම්බයේ බොහෝ කොටස් බසයට ඉහලින් විසිවී තිබුනා ,හැබැයි ඒ කම්පනයට බසය නැවතී තිබුනා ,බසයේ ටයරයක හුලන්ගොස් තිබුනා ,

නැවතත් බසය පනනන්වා ගත් රියදුරු රීම් එකෙන්ම බසය ටික දුරක් ගෙනගොස් තිබුනා ,ඒ වෙලාවේ බසයට ගොඩ උණු ත්‍රස්තයන් රියදුරුගේ දෑතටම වෙඩි තබා තිබුනා ,බසය නැවතුනු පසු බසයේ දොරවල් අසල රැක සිට බිමට බහින මගීන්ට වෙඩිතබා තිබුනා ,මගේ හොද මිත්‍රයෙකු වන මේ රියදුරා පසුව මට ඔහුගේ නිවසේදී හමු උනා ,ඔහුගේ දෑතම වෙඩි තැබීමෙන් අප්‍රාණික වී තිබුනා ,තමන්ගේ බසයට ගොඩ උණු මගීන් තමාගේ දෑස ඉදිරිපිටම මරා දැමීමේ කම්පනයෙන් ඔහු ගොළුවී සිටියා ,

ඔන්න ඔහොමයි ඒ ලේ වැගිරීම උනේ ,මේ ලියන මොහොතේත් මට එදා දැනුනු කම්පනය දැනෙනවා .එදා ඒ සිද්දියෙන් පස්සේ තවත් ගොඩක් දේවල් උනා ,ඒවා ඉදිරි කාලයේ ඔබ වෙත ගෙන එන්නම්.

මීලග කොටසින් - යාල මැදදී බෆල් රථයේ සෙබළුන් බේරාගත් අභීත රියදුරා කවුද ?

Monday, November 19, 2012

තමුසේ දන්නවද කවුද කතාකරන්නේ කියලා



ඔන්න අදත් තවත් බැංකු රස කතාවක් ,මේකනම් මං අහපු එකක් හරිය ,

ඔන්න එක බැංකුවක් උදේ අරින්න කලින්  උන වැඩක්,බැංකුව කස්ටමර්ලට එන්න දොර අරින්න කලින් බැංකුවේ කට්ටිය උදේ එනවනේ අන්න ඒ වගේ වෙලාවක් ,සාමාන්යෙන් උදේම එන්නේ සුද්ද පවිත්‍ර කරන කෙනා ,කා .කා .ස  මහත්තයා ,සහ ආරක්ෂක නිලදාරියා තමයි ,ඔන්න මෙහෙම දවසක උදේ අපේ පවිත්‍ර කරන කෙනා [අපි ලේසියට මිනිහට  සුනිල් කියමුකෝ ]මේසයක් යට රිංගලා මකුළු දැල් එහෙම කඩනවලු ,එතකොටම ටෙලිෆෝන් එක 

ට්‍රීන් ....ට්‍රීන් .....ට්‍රීන් 

කා .කා .ස සහ ආරක්ෂකයා ආගිය අතක් නැතිලු ,ෆෝන් එක තාම 

ට්‍රීන් ....ට්‍රීන් ....ට්‍රීන් ...

ඉතින් බැරිම තැන සුනිල් බොහොම අමාරුවෙන් මේසේ යටින් රිංගලා ඇවිත් ෆෝන් එක ආන්සර් කලාලු

සුනිල් - හලෝ ..

අනිත් පස - හෙලෝ ,මැනේජර් මහත්තයා ඉන්නවද ?

සුනිල් - මැනේජර් මහත්තයා තාම ඇවිත් නෑ ,පස්සේ ගන්න.

ෆෝන් එක තියලා සුනිල් ආයිත් මේසේ යටට රින්ගුවලු ,ඔන්න තව ටිකකින් ආයිත් 

ට්‍රීන් ........ට්‍රීන් ........ට්‍රීන් .....

ටික වෙලාවක් බලාගෙන හිටියත් කලින් සේතෙමලු ,සුනිල් ආයිත් බොහොම අමාරුවෙන් එලියට ඇවිත් ෆෝන් එක ආන්සර් කලාලු ,බැලින්නම් කලින් පොරමලු 

සුනිල් - හලෝ

අනිත් පස - හෙලෝ ,මැනේජර් මහත්තයා ඉන්නවද ?

සුනිල් - මහත්තයා මං දැන් එක පාරක් කිව්වනේ ,මැනේජර් මහත්තයා තාම ඇවිත් නෑ ,පස්සේ ගන්න.,හරිද 

දඩාස් ගාල රිසීවර් එක ෆෝන් එකෙන් තියපු සුනිල් ආයිත් මේසේ යටට රින්ගුවලු ,දෙය්යනේ ඔන්න ආයිත් ටිකකින් ...


ට්‍රීන් ........ට්‍රීන් ........ට්‍රීන් .....

සුනිල් මේසේ පෙරලගෙනම නැගිටලා ඇවිත් ෆෝන් එක ආන්සර් කලාලු,යකෝ ඒත් අර වොයිස් එකමලු.

සුනිල් - හලෝ

අනිත් පස - හෙලෝ ,මැනේජර් මහත්තයා ඉන්නවද ?

සුනිල් - මං දැන් තමුසෙට දෙපාරක්ම කීවානේ ,මැනේජර් මහත්තයා තාම නැහැ , ........ගන්නැතුව පස්සේ ගන්නවා 

අනිත් පස - තමුසේ දන්නවද මං කවුද කතාකරන්නේ කියලා ,

සුනිල් - නෑ 

අනිත් පස - දැනගන්නවා ,මං R.M.කතාකරන්නේ [ඒ කියන්නේ REIGIONAL MANAGER ,නොහොත් ප්‍රාදේශීය කළමනාකරු ]

සුනිල්ට හීං දාඩිය දැම්මලු ,හැබැයි මිනිහා ටාර් ගාල මොලේ පාවිච්චි කලාලු ,

සුනිල් -එතකොට තමුසේ දන්නවද මං කවුද කියලා ..

R.M.- නෑ දන්නෑ 


සුනිල් - එහෙනම් කමක් නෑ ....

කියලා දඩාස් ගාල ෆෝන් එක තිව්වලු ...

Sunday, November 18, 2012

උක..ස් පේමන්ට්



මේක මන් ජොබ් එකට ගියපු මුල් දවසේ උනු වැඩක් ,මන් ඉස්සෙලාම පත්වීම ලැබුනේ බුත්තලට ,ආ ... මන් වැඩකරන්නේ රාජ්‍ය බැංකුවක හරිය ,

ඉතින් මුල්ම වැඩේ හැටියට මැනේජර් මහත්තයා මට කිව්වා විමසීම් කවුන්ටරේ ඉන්න කියලා ,සේවක හිගය නිසා අලුත් කියලා නැහැ මන් විතරයි එතන හිටියේ ,

ඔන්න ඉතින් ටික වෙලාවකින් මිනිස්සු ඇවිත් අහන්න ගත්තා "මහත්තයා  
උක..ස් පේමන්ට් කරන්නේ කොතනද කියලා ,මාත් ඉතින් රජා වගේ ඒ අයට රත්තරන් බඩු උකස් තියෙන තැන පෙන්නනවා ,මෙහෙම ටික වෙලාවක් යනකොට කොහොමත් මිනිස්සු 50 ක් විතර උකස් කාමරේ පිරිලා ,

එතකොට එතන වැඩකලේ ටිකක් මහත දෙහෙත අක්කා කෙනෙක් ,මෙන්න ටිකකින් අක්කා එනවා මගේ දිහාට නාලාගිරි හස්ති රාජයා වගේ ,ඇවිත් ඇහුවා "මල්ලි උබට පිස්සුද බැංකුවට එන ඔක්කොම උකස් කාමරේට එවන්නේ "කියලා ,මන් කිව්වා අක්කේ ඒ මිනිස්සු අහන්නේ උකස් පේමන්ට් ගැන නිසා මන් එහෙට එව්වා කියලා ,

එතකොට ඒ අක්කා කියපි "යෝදයෝ උකස් පේමන්ට් නෙමෙයි උක්ගස් 
පේමන්ට් ගැන මිනිස්සු අහන්නේ කියලා "ඒ කියන්නේ පැලවත්ත සීනි කම්හලට මිලදී ගන්න උක්ගස් වලට කරන ගෙවීම් ගැන ,මන් ඉතින් ඔය හාන්කවිසියක් දන්නවා කියලයි ,

ඒ කාලේ  කම්හලෙන් නිකුත් කරපු කුවිතාන්සියට කවුන්ටරෙන් කෙලින්ම ගෙවීම් කළා ,පසුව ඒ පිළිබද ඇති ව්‍යාකූල බව නිසා අපි සමාගමත් එක්ක කතාකරලා ඒවා ගොවීන්ගේ ගිණුම් වලට හැරෙව්වා 

ගොහින් එන්නම් 

Saturday, November 17, 2012

පාන්දරින් ඉස්කෝලෙට බක්කි කරත්තෙන්



අද මං කියන්න යන්නේ මාතර අපි කාටත් හුරුපුරුදු දසුනක් වෙලා තිබිච්ච දැන් බේතකටවත් හොයාගන්න නැති බක්කි කරත්ත ගැනයි ,අපි පොඩි කාලේ නගරේ ඉස්කෝල ළග උදේටයි දවල්ටයි දකින්න තිබුණු සුලබ දසුනක් වන බක්කි කරත්ත දැන් සමාජයෙන් සැගවිලා ගිහින්

යටත් විජිත යුගයේදී මාතර ඇරබුනු රාහුල ,සුජාතා ,ශාන්ත තෝමස් ,ශාන්ත සෙර්වේසස්,මාතර කන්‍යාරාමය වගේම ඉන් පසුකාලීනව ඇතිවුණු මධ්‍ය මහා විදුහල ,මහාමායා විදුහල වැනි පාසල් වලටත් ළමුන් ප්‍රවාහනය කිරීමේ මාධ්‍යයක් වශයෙන් අනුව දශකයේ මැදක් වනතුරුම මෙම බක්කි කරත්ත පැවතුනා ,

බොහෝ දුරට මෙම බක්කි කරත්ත ළමුන් බාරගත්තේ එක පාසලකට එන ළමුන් පමණයි ,මොකද පාසල් දෙකක් අතර යාමට වැයවන කාලය වැඩි නිසා ,ඒත් රාහුල ,සුජාතා පාසල් එකිනෙක ළග පිහිටා තිබීම නිසා එම පාසල්වල සිසුන් එකම බක්කි කරත්තවල ගෙනගොස් අරලීමටත් බාරගනු  ලැබුවා ,

විශේෂයෙන්ම මෙලෙස බාරගත්තේ ප්‍රාථමික පන්තිවල සිසුන් වූ අතර එයට හේතු වන්නට ඇත්තේ බක්කි කරත්තයේ තිබුණු කුඩා ඉඩකඩ ඇතුලත ගෙනයාහැකි උපරිම ප්‍රමාණයක් ගෙන යාම වියහැකියි ,එමෙන්ම ඉහල පන්තිවල සිසුන් බක්කි කරත්තෙන් පාසල් යෑමට දැක්වූ අකමැත්තත් වියහැකියි ,

මෙලෙස ගෙවල් වලින් බාරගත් සිසුන් පාසැල ලගට ඇරලීමට යාමේදී සමහර බක්කි කරත්ත රියදුරන් එම ළමුන්ගේ පාසල් බෑග,වතුර බෝතල් පන්තියටම ගෙනගොස් දෙනවා ,පාසැල ඇරෙන වෙලාවට ගේට්ටුව ගාව ඉදගෙන තමන්ගේ ළමුන් එකතු කරන බක්කි කරත්ත රියදුරන් දකින්නට හැකියි ,

ළමුන් පාසලට ඇරලු පසු තමන්ගේ බක්කි කරත්තයේ බැද සිටින ගොනාට ආහාර සැපයීමටත් එකිනෙකා සමග සතුටු සාමීචියේ යෙදීමටත් 
බක්කි කරත්ත රියදුරන් තෝරාගත් තැන් තිබුනා ,මාතර රාහුල පාර ,ඉසදීන් නගරය අවට එවැනි තැන් කීපයක් ,මේ බක්කි කරත්ත අතර ලස්සන ලෙස සරසා තිබු බක්කි කරත්තත් තිබුනා , ඒ විතරක්ද සමහර ඒවායේ පොඩි රේඩියෝවක් පවා තිබුනා ,

අනුව දශකයේ අග බාගයේ ඇතිවූ වාහන තදබදයේ ඉහල යාමත් ,සිසුන් බක්කි කරත්තවල යෑමට දැක්වූ මැලිකමත් මේ ඔක්කොටම වඩා ඉහල ගිය පාසල් වෑන් ගණනත් නිසා කෙමෙන් කෙමෙන් මේ බක්කි කරත්ත සමාජයෙන් තුරන් වෙලා ගියා ,දැන් ඉතින් ළමයෙකුට බක්කි කරත්තයක් දකින්න තියෙන්නේ රූපෙකින් හරි කෞතුකාගාරෙකින් හරි විතරයි ,

චායාරූප ගත්තේ - http://lankapura.com

Thursday, November 15, 2012

මාතර බත් කඩේ


අදනම් ටිකක් වෙනස් මාතෘකාවක් ,මාතර බත් කඩයක් දැකලා නැත්තේ කවුද ?කවුරුත් වගේ දැකලා ඇතිනේ , අර කවුද කියන්න වගේ හඳට යනකොට එහෙත් එකක් දාල තිබුනයි කියනවනේ  ,හැබැයි කොහේ තිබුනත් මාතර බත් කඩයක් නැති එක ටවුමක් නම් මේ ලංකාවේ තියෙනවා මං දන්නා තරමින් ,කියමුද බලන්න .........

දන්නැත්නම් දැනගන්න ඒ තමයි මාතර .....ඇත්තයි සත්තයි 

ඇත්තටම රටපුරා මාතර බත් කඩ ඇතිවීමේ ප්‍රවනතාවය ඇතිවුනේ කොහොමද කියලා අපි හොයලා බැලුවොත් ඒකට හේතු උනේ පහත හේතුවයි කියලා මං හිතනවා ,

මාතර උපන් පුද්ගලයින් රැකියාවල් සොයාගෙන යාම නිසා රට පුරා පැතිරුනා ,ඉතින් මෙහෙම ගමින් පිට උණු අය ඇරඹු කෑම කඩ වල ඔවුන් බොහෝවිට පිළිගැන්වූයේ තම ගම් ප්‍රදේශයේ කෑම වගේම ගමේ පිළිවෙලට සැකසු කෑම වර්ගයි,මොකද බොහෝ වෙලාවට මේ කෑම පිළියෙළ කලේ කඩේ මුදලාලිගේ මාය්යා නිසයි ,ඉතින් මෙහෙම කඩ ඔය බෝඩ් ලෑලි නොගැහව්වට නිකම්ම "මාතර බත් කඩ" උනා ,

මේ මාතර බත් කඩවල තිබුණු කෑම මොනවද ...

අනිවාර්යෙන්ම මේවා නම් තිබුනා 


රතු කැකුළු බත 


මාළු ඇඹුල්තියල් 

පොලොස්

පොල් සම්බල

දැන්නම් රට පුරා මාතර බත් කඩ , ඒ වුනාට ඒවා කීයෙන් කීයද නියම මාතර බත් කඩ වෙන්නේ ,

ගිහින් එන්නම් ,

ප ලි : අදනම් සුදානම් වෙලා දාපු පොස්ට් එකක් නෙමේ ,අඩු පාඩු ඇතොත් කමා කරනු මැනවි


Wednesday, November 14, 2012

සුල්තානගොඩ කළු මහත්තයා - මාතරින් ලොව ජයගත් අපේ හපන්නු 02

මාතෘකාව දැක්ක ගමන් කාටවත් ක්ලික් වෙන්න නැතුව ඇති මං අද මේ කවුරු ගැන කියන්න යනවද කියලා ,අද මං කියන්න යන්නේ සුල්තානගොඩ කළු මහත්තයා නොහොත් හේවා කොමනගේ ධර්මදාස මහත්තයා ගැනයි ,ම්හු .. ඒත් මතක වෙන්නේ නෑ නේද ? එහෙනම් මෙහෙම කියමු ,එච් .කේ .ධර්මදාස නොහොත් " නවලෝක මුදලාලි ",ආ.... දැන්නම් කවුරුත් දන්නවා නේද ,හරි හරි දැන් ඔය ඇරිලා තියෙන කට වහගෙන ඉතුරු ටික කියෝමු .



මේ ඉන්නේ අපේ කාලයේ චුල්ල සෙට්ටි සිටුතුමා කිව්වොත් වැරදි නැහැ 

1920 ජුනි මස 20 වෙනිදින මාතර සුල්තානගොඩ වරකපිටිය වත්තේ ජන්ගිරිස් අප්පුහාමිටත් මද්දුම හාමිනේටත් ලැබුණු පුත්‍ර රත්නය වන මෙතුමාට ගමේ අය ආදරේට කිව්වේ කළු මහත්තයා කියලයි ,ගමේ ගොඩේ වෙල් ඉපනැල්ලේ හැදී වැඩුණු මෙතුමා පසුකාලීනව කෙතරම් ඉහලට ගියත් එම ගැමිසුවදනම් අමතක කලේ නෑ ,




සුල්තානගොඩ නිවස වර්තමාන ස්වරූපය 

කළු මහත්තයාට වයස 13 ක් වෙනකොට සිද්ද උණු පියාගේ වියෝව මෙතුමාගේ ජීවිතයේ හැරුම් ලක්ෂය වෙනවා ,පියාගේ අවසන් කටයුතු වලින් පසුව තමා සතුව තිබු සත 75 ක මුදලත් ඇදුම් කඩමාලු කීපයත් පත්තර කැබැල්ලක දවටා ගන්නා මෙතුමා පන්සලේ ලොකු හාමුදුරුවන්ගේ උපදෙස් පරිදි තමන්ගේ අනාගතය සරි කරගැනීම සදහා කොළඹ එනවා ,

කොළඹ ඇවිත් මාතර වෙළෙන්දෙකු වන පියදාස මුදලාලි හමුවීමට යන මෙතුමා එහිදී තමන්ගේ අරමුණු ඉෂ්ට නොවන බව දැන පසුදාම සදලන්කාව ප්‍රදේශයේ සිටින තම පියාගේ හිතවතෙකු වන මනම්පේරි මුදලාලි හමුවීමට ගොස් එහි වසර දෙකක් පමණ සේවය කරනවා ,නැවතත් කොළඹ පියදාස මුදලාලි හමුවට ඇවිත් එහිත් තව වසර දෙකක් පමණ සේවය කරනවා ,

මෙම කාලය තුල විශාල ප්‍රමාණයක් වෙළෙන්දන් හදුනා ගැනීම මත කළු මහත්තයා තීරණය කරනවා තමන්ගේම වෙළදාමක් ඇරඹීමට ,එහිදී ඔහු තමන්ගේ වෙළදාම ඇරඹීමට තෝරාගන්නේ පෑලියගොඩ ප්‍රදේශයයි ,පසුකාලේයෙදී ඔහු ප්‍රකාශ කල ආකාරයට ඔහු එම තීරණය ගත්තේ කොළඹට එන සියලුම කරත්ත පාහේ කොළඹට ඇතුළුවෙන්නේ පෑලියගොඩ හරහා නිසයි ,

මේ කාලයේ තමන්ගේ අනාගත සහකාරිය තෝරාගන්නා කළු මහත්තයා විවාහ දිවියට එළබෙන්නේ තමන් දිවා ආහාරය ලබාගන්න අවන්හල පවත්වාගෙන ගිය මීලින් නෝනා සමගයි ,මීලින් නෝනාගේ සහෝදරයින් මුලින් මෙම කටයුත්තට අකමැත්තක් දැක්වූවත් පසුව එකග වෙනවා ,



විවාහය කළු මහත්තයාගේ ජීවිතයේ නව පිටුවක් පෙරලුවායයි කිව්වොත් වැරදි නැහැ ,කළු මහත්තයා තමන්ගේ තේ , පොල් , රබර් වෙළදාම සිදුකරන අතරේ මීලින් නෝනා තමන්ගේ අවන්හලේ කටයුතු කරගෙන යනවා ,මේ කාලෙදී තමන්ගේ වෙළදාම තවදුරටත් පුළුල් කරන කළු මහත්තයා ලී වෙලදාමටත් අත තබනවා ,කොන්ත්‍රාත් කටයුතු වලටද අත ගහන කළු මහත්තයා අවන්හලේ කටයුතු සීමා කිරීමට තීරණය කරන්නේ  ගවමස් කෑම සහ මත්පැන් පානය තමන්ගේ ආගම දහමට එකග නොවන නිසයි ,මේ කාලෙයේම තමන්ගේ ව්‍යාපාරය "නවලෝක" නමින් නම් කරන්නත් කළු මහත්තයා කටයුතු කරනවා ,

මෙලෙස ටිකෙන් ටික ව්‍යාපාර කටයුතු දියුණු කරගන්නා මෙතුමාටත් 1977 විවුර්ත ආර්ථිකය හදුන්වාදීමත් සමග දේශීය ව්‍යාපාරිකයින් මුහුණ දුන් අභියෝග සියල්ලටම මුහුණ දෙන්න වෙනවා , එම අභියෝගයත් සාර්ථකව ජයගන්නා මෙතුමා නවලෝක රෝහල ඇරඹීම මගින් තමන්ගේ නවලෝක සමුහ ව්‍යාපාරය තවදුරටත් පුළුල් කරනවා ,

විවාහය මගින් දියණියන් සිව්දෙනෙකු  සහ ජයන්ත සහ උපාලි නම් පුතුන් දෙදෙනෙකු ලබන මෙතුමා තමන්ගේ දරුවන් නිසි අද්‍යාපනය ලැබූ පසු තමන්ගේ ව්‍යාපාර කටයුතු වලට සම්බන්ද කරගන්නවා ,හැබැයි ඒ ඉහලම තැනින් නම් නෙමෙයි ,පහලම තැන ඉදලා ඉහලට එන්න ඔවුන්ට ඉඩ සලස්වලා දෙනවා ,




පහේ පන්තිය දක්වා පමණක් අද්‍යාපනය ලැබූ මෙතුමා තමන්ගේ දර්ශනය මගින් ඉහලට නැග්ග ආකාරය පුදුම සහගතයි ,පසු කාලෙදී එතුමා විසින්ම එතුමාගේ දියුණුවට හේතු උණු කරුණු දැක්වුවා ,එනම් මුල අමතක නොකිරීම, "නෑ" , "බෑ" උත්තර ලෙස බාරනොගැනීම,ධාර්මිකව හම්බ කිරීම සහ වියදම් කිරීම ,අපතේ යාම නැවතීම සහ අද කලයුතුදේ අදම කිරීමයි ,

අදවනවිට ලංකාවේ ලොකුම සමුහ ව්‍යාපාරයක් වන නවලෝක ව්‍යාපාරයේ කටයුතු තමන්ගේ අවසන් කාලය දක්වාම තමන් යටතේ පවත්වාගත් මෙතුමා සාම දිනකම උදෑසන 10.15 සිට හවස 5.00 වනතෙක් තමන්ගේ කාර්යාලයේ රැදී සිටියා ,නැගී එන ව්‍යාපාරිකයින්ට කළමනාකරණ පොත් දහසකින්වත් ලබාගත නොහැකි ගුණාංග මෙතුමාගේ ජීවිතය අද්යයනය කිරීමෙන් ලබාගත හැකියි ,

දේශමාන්‍ය ගරු නාමයෙන් පුද ලද මෙතුමා 2011 අගෝස්තු මස 10 වෙනිදා දැයෙන් සමුගත්තා ,

Tuesday, November 13, 2012

මචෝ


ඔන්න ඉතින් මන් දැන් ඔහෙලට කියන්න යන්නේ අපේ ගමේ ඉන්න පොරකට  නමක් හැදුනු විදිහක් ගැන ,හරිය,පොරට දැන් කවුරුත් කියන්නේ "මචෝ" කියලා 

මේ  ගොය්යා උන්නේ ගඟ අද්දරම හදාගත්ත ගේක ,ආ... කියන්න අමතක උනා ,මේ කාලේ වෙනකොට මෙයයි පොඩි එකා හරිය ,උන්නේ අම්මයි තාත්තයි එක්ක තමයි

කොහොමත් ඉතින් උඩහට වහපු ගමන් ගඟ දෙගොඩ තලාගෙන යන්න පටන් ගන්නවා,එතකොට මෙයයි ගෙදර අනිත් ඔක්කොමයි ඉතින් ගන්න පුළුවන් දෙයක් අරගෙන ඉතින් ඉක්ඉක්මනටම උස් තැනකට යනවා ගෙදර තිබ්බ ඔරුවෙන් ,තේරුනයි,මක්ක ගන්න බැරිඋනත් ගෙදර තියෙන වී ටිකනම් කොහොමහරි ගොඩට ඇදගන්නවා ,නැත්තන් ඉතින් කාලා හමාරයි නේ ,



ඔන්න ඔයි වගේ දවසක  ඉතින් මෙහෙම තාත්තයි පුතයි එකතු වෙලා ඔරුවෙන් වී ටික ගොඩට අදිනවා,එතකොට

පුතා - තාත්තේ දැන් අපි හිතමු අපි මේ ඔරුව පැදගෙන යනකොට කිඹුලෙක් ලගට ආවයි කියලා

තාත්තා - ඉතින්

පුතා - එතකොටම මේ ඔරුව පෙරලිලා අපි වතුරට වටුනයි කියලා

තාත්තා - ඔව් ඔව් ඉතින්

පුතා - එතකොට ඔහේ ඉස්සෙල්ලම බේරාගන්නේ මන්ද නැත්තන් වී ගෝනියද

තාත්තා - උඹ මේ මක්ක අහනවද ,මන් පැනපු ගමන් බේරාගන්නේ උඹනේ පුතේ

මෙන්න මු ගත් කටටම කියපිනම් 

අන්න හරි මචෝ එහෙම තමයි ඉන්න ඕන 

මාතරින් ලොව ජයගත් අපේ හපන්නු 01 - දොන් කරෝලිස් අප්පුහාමි මහතා

ඔන්න අද අලුත් වැඩකට අත ගහනවා ,මේ ලිපි පෙලින් බලාපොරොත්තු වෙන්නේ මාතර ජන්ම භූමිය උන මේ වෙනකොට ලෝකෙම දන්නා අය බවට පත්වුණු අය ගැන ඔබ නොදන්නා  විස්තර ගෙන ඒමයි ,

ඉතින් අද හා හා පුරා කියලා විස්තර ගෙන එන්නේ අභිමානවත් මාතර පුත්‍රයෙක් ගැන ,එතුමා තමයි දොන් කරෝලිස් අප්පුහාමි මහතා නැත්නම් දොන් කරෝලිස් හේවාවිතාරණ මහතා ,


1833 මාතර මැද හිත්තැටිය ගමේ පොකුනුවත්තේ උපත ලබන මෙතුමාගේ පියා වෙන්නේ හේවාවිතාරණ ඩිංගිරි අප්පුහාමි මහතායි ,හිත්තැටිය රජ මහා විහාරය ඇසුරේ හැදී වැඩෙන මෙතුමා ජෝතිෂය පිලිබදව ඉගෙන ගන්නවා ,තමන් ඉගෙන ගන්නා ශාස්ත්‍රය අනුව සහ ගුරු හාමුදුරුවන්ගේ උපදෙස් අනුව තමන්ගේ ජය භූමිය සොයා කොළඹට එනවා ,

කොළඹදී ව්‍යාපාරික කටයුතු අරබන මෙතුමා 1860 දී කොළඹ ව්‍යාපාරික මහතෙකු වන ලන්සිගේ අන්දිරිස් පෙරේරා ධර්මගුනවර්ධන මහතාගේ දුවණිය වන මල්ලිකා ධර්මගුනවර්ධන මෙනවිය සමග විවාපත් වෙනවා ,



කොළඹ පිටකොටුවේ H.DON KAROLIS නමින් ගෘහ භාණ්ඩ වෙලදසැලක් අරබනවා ,මෙම භාණ්ඩ වල තිබූ උසස් නිමාව නිසා ලෝක ප්‍රසිද්ද තත්වයට පත්වෙනවා ,

තේ අපනයන හැරුණු කොට වෙනත් දෙයක් ගැන සිතීමටවත් බැරිඋනු 1886 තරම් ඈත යුගයකදී ඔස්ට්‍රේලියාවට ගෘහ භාණ්ඩ අපනයන කිරීමට මේ වනවිට H.DON KAROLIS & SONS නමින් පැවතුනු මෙම ආයතනය සමත් වෙනවා ,

1895 දී ලන්ඩන් නගරයේ අරඹන ව්‍යාපාරික ස්ථානය මගින් දකුණු අප්‍රිකාවට ,ඉන්දියාවට , බුරුමයට ,යුරෝපයට සහ ඇමෙරිකාවට භාණ්ඩ අපනයන කටයුතු පටන්ගන්නවා ,මෙම කාලෙයේදීම කොළඹ පටන් ගන්නා වාෂ්ප මගින් ගෘහ භාණ්ඩ නිපදවීම ඉතා ජනප්‍රිය වෙනවා ,



20 වන සතවර්ෂයේ මුල් කාලයේදී ලෝකය පුරා පවත්වන ගෘහ භාණ්ඩ ප්‍රදර්ශන වලදී සම්මාන දිනාගන්නත් මෙම සමාගම සමත් වෙනවා ,එහි ප්‍රතිපලයක් විදිහට එංගලන්තය ඇතුළු යුරෝපාකරයේ රජ පවුල් වල භාවිතය සදහා මෙම භාණ්ඩ ලබාගැනීමට ඔවුන් කටයුතු කරනවා .



මෙම කාලයෙදී හෙන්රි ස්ටීල් ඕල්කට් තුමාගේ ප්‍රදානත්වයෙන් රටපුරා පැනනගින බොදු පුනර්ජීවනයේ මුලිකත්වය ගන්නා මෙතුමා වෙසක් නිවාඩුව සහ බෞද්ධ ධජය  නිර්මානයේදීත් මුල් වී කටයුතු කරනවා ,එමෙන්ම මාතර හිත්තැටිය රජමහා විහාරය ඇතුළු විශාල විහාර ගණනක් ගොඩනන්වන්නත් මෙතුමා තමන්ගේ ධනය නිර්ලෝභීව යොදවනවා .

පුතුන් 4 දෙනෙකුගේ සහ එක දියණියකගේ පියා වන මෙතුමාගේ පුතුන් දෙදෙනෙක් පියාගේ වෙළද ව්‍යාපාර භාරව කටයුතු කරනවා ,වඩාත් ප්‍රසිද්ද වන අනෙත් පුතුන් දෙදෙනා තමයි දොන් ඩේවිඩ් හේවාවිතාරණ සහ දොස්තර චාල්ස් අල්විස් හේවාවිතාරණ,මෙයින් දොස්තර සී ඒ හේවාවිතාරණ මහතා නිදහස් සටනේ පුරෝගාමියෙකු වෙනවා ,දොන් ඩේවිඩ් හේවාවිතාරණ නොහොත් දෙටු පුත්‍රයා ලෝකප්‍රසිද්ද වෙන්නේ අනගාරික ධර්මපාල නමින්,



එමෙන්ම මෙතුමාගේ බෑනා වන කුමාරදාස් මුණසිංහ මහතා තමයි අලියා ගිනි පෙට්ටි සමාගම පටන්ගන්නේ ,මෙලෙස රටටත් ජාතියටත් අමිල සේවයක් කල මෙතුමා 1906 පෙබරවාරි මස 18 වෙනිදා දැයෙන් සමුගත්තා ,

තොරතුරු සහ චායාරූප අන්තර්ජාලයෙනි .

නිවාඩුවට travel එකක් - මාතර නගරය අවට

ඔන්න අද මං ඔහෙලට ගේන්නේ ඔහෙලා මාතර එනවනම් හරි නැත්නම් මාතර පහුකරගෙන කොහෙහරි යනවනම් හරි යන එන ගමන් බලන්න යන්න පුළුවන් තැන් ටිකක් ගැන විස්තර ටිකක් ,මේ ඕනෑම තැනක් බස් එකේ ගිහින් බලන්න පුළුවන් ,නැත්නම් අලුතින් රේසින් කාර් එකක් අරගෙන බලන්න යන්නත් පුළුවන්.

01.නුපේ ලන්දේසි වෙළදපොළ [nupe dutch market]

මාතර නගරයට පිවිසෙන විටම නුපේ හන්දියේදී දකුණු අත පැත්තෙන් දකින්න පුළුවන් ,ලන්දේසි කාලයේ ගොඩනගපු වෙළදපොලක් දැන් පුරාවිද්‍යා දෙපාර්තමේන්තුවෙන් සංරක්ෂණය කරලා තියෙනවා.

02.මාතර තාරකා කොටුව [ star fort ]



ලන්දේසීන්ගේ කාලෙම ගොඩනංවන ලද්දකි ,මෙහි විශේෂත්වය තමයි තරුවක ආකාරයට ගොඩනංවා තිබීම ,දැනට පුරාවිද්‍යා දෙපාර්තමේන්තුවෙන් සංරක්ෂණය කර ඇත,මාතර ඉතිහාසය පිළිබද කෞතුකාගාරයක්ද පිහිටුවා ඇත .මාතර බෝධිය පහුකරපු ගමන් උයන්වත්ත පිට්ටනිය ලගම ඔබේ වම් අත පැත්තෙන් දකින්න පුළුවන් .

03.මාතර කොටුව [matara dutch fort ]


මාතර වෙරල තීරයටත් නිල්වලා ගඟටත් අතර පිහිටා ඇත,බීච් ඒකට යනවනම් ඒ ගමන්ම යන්න පුළුවන් ,ඒ ගමන්ම කොටුව ඇතුලේ පැරණි ගොඩනැගිලි බලන්න යන්නත් පුළුවන් ,රසට කෑම වේලක් ගන්නත් විවේකෙට ඉන්නත් පුළුවන් විදිහට දැන් මාතර තානායමත් නවීකරණය කරලා තියෙනවා ,


04.මාතර බෝධිය 

මාතර යනවනම් අනිවාර්යෙන්ම යන්න .

05.මාතර කතෝලික පල්ලිය [ st. mary's church ]


මාතර වෙරල මාවතේ පිහිටා ඇත ,ශ්‍රී ලාංකික කතෝලික ජනතාවගේ නොමද ගෞරවයට පත් ස්ථානයකි ,

06.පරෙවි දූපත සහ පාලම 


මාතර බස් නැවතුම්පොළ ඉදිරිපිට වෙරළේ පිහිටා ඇත ,දැන් මෙහි රෝහණ පාර්ශ්ශවයේ පොහොය ගෙය පිහිටුවා ඇති බැවින් බලන්න යනවනම් විනීත ඇදුමකින් සැරසී යන්න ,නැත්නම් ආපසු හරවා එවාවි .

07.මාතර වෙරළ [ matara beach ]


හැන්දෑවකට යන්න කියාපු තැනක් ,නානවානම් පොල්හේන වෙරළට යන්න ඕන ,මාතර බස් ස්ටෑන්ඩ් ඒක ළග වෙරළ නෑමට සුදුසු නැ ,එතන දියවැලක් තියනවා ඒකට අහුවුනොත් රුහුණු කැම්පස් එක ලගින් ගොඩට එන්න පුළුවන් ,හැබැයි පණපිටින් නම් නෙමෙයි .

08.රුහුණු විශ්වවිද්‍යාලය [ ruhunu university]


මේක බලන්න යන්නනම් එක්කෝ විබාගේ හොදට පාස් වෙන්න වෙයි නැත්නම් විශේෂ අවසරයක් ගන්න වෙයි ,මාතර පහුකරලා කතරගම යනකොට ඔබේ වම් අත පැත්තෙන් දකින්න පුළුවන් ,

09.දෙවිනුවර ප්‍රදීපාගාරය [dondra light house ]


අපේ රටේ දකුණු කොන ,ලස්සන තැනක් ,දැන්නම් උඩට නගින්න දෙන්නේ නැහැ ,මේකේ විශේෂත්වය තමයි මේ ප්‍රදීපාගාරයට පස්සේ ලෝකේ දක්ෂිණ ද්‍රවයට යනකම් කිසිම ප්‍රදීපාගාරයක් දකින්න නැහැ ,බස් එකේ යනවනම් දෙවිනුවර දේවාලේ ගාව බැහැලා ත්‍රී වීල් එකකින් යන්න ,මං හිතන්නේ රුපියල් 100 ක විතර දුර 

10.දෙවිනුවර ශ්‍රී උපුල්වන් දේවාලය 


බොහොම අනුහස් ඇති තැනක් ,අනිව්වර්යේන්ම යන්න .මෙතෙන්ට යනවනම් තව පොඩි තැනක් තියෙනවා එතනටත් යන්න ,ඕන කෙනෙක්ගෙන් පාර ඇහුවම කියාවි ,


මෙතෙන්ට කියන්නේ "ගල් ගේ" කියලා ,පුරාන විෂ්ණු දේවාලය හැටියත් සලකනවා ,

11.වෙහෙරහේන විහාරය 


මාතර බස් ස්ටෑන්ඩ් එකෙන් බැහැලා කැකනදුර බස් එකක යන්න ,එතකොට පන්සල ලගින්ම බහින්න පුළුවන් ,බුදු පිළිමය වන්දනා කරනවා වාගේම සිත්තම් ලෙන් විහාරය බලන්නත් යන්න ,ආ .. සල්ලි කන මල්ලි ඉන්නෙත් මේ පන්සලේ [ පින් කැටයක් එහෙම  යට ගහලා තිබුනා  ,දැන්නම් ඒක මකලද දන්නේ නැහැ ]

ඔන්න අද මං ගෙනාවේ මාතර නගරය අවට ඔහෙලට බස් එකේ උනත් ගිහින් බලන්න පුළුවන් තැන් ටිකක් ,ඉදිරියේදී මෙම තැන් ගැන සවිස්තරව විස්තර ගේන්නත් මං බලාපොරොත්තු වෙනවා ,

ගිහින් එන්නම් .

ප . ලි .කවුරුහරි පන පිටින් අපාය දැකලා තියෙනවාද ?මාතර එහෙම බලන්න පුළුවන් තැනක් තියෙනවා ,කියමුද බලන්න ,ඒ තැන ඇතුළුව තවත් වැදගත් තැන් ගැන විස්තර ඉදිරියේදී .....

linkwithin

Related Posts Plugin for WordPress, Blogger...