හෙල්සින්කි දිනපොත ලියලා තිබුනට මුලින්ම කියන්න ඕන මේක මගේ දිනපොතක් ලිවීමක් නොවෙන විත්තිය.කාලෙකට පස්සෙ විවේකී කාලසීමාවක් ආපු නිසාත් අලුත් රටක වාසයට ඇවිත් අලුත් අත්දැකීම් ගොඩකුත් දිනපතා එකතුවෙන නිසත් ඒ අත්දැකීම්වලින් ලියන්න තරම් වටිනවා කියල හිතෙන දේවල් ගැන ලියන්න හිතුනා.බ්ලොග් කෙරුවාවට සමුදීලා අවුරුදු 10 ක් විතර වෙන්නත් ආවා.බ්ලොග් ලිවිල්ල නිසා හමුවුන පාඨකයෙක් ජීවන සහකරු වුන නිසා බ්ලොග් ලිවිල්ලත් එහෙම්මම නැවතුනා.බලන්න නයනී ඒකෙත් හැටි.....
ලියවිල්ල නිසාම හමුවුනු සහකාරියත් එක්කලා වැඩිදුර අධ්‍යාපන කටයුතු සදහා මේ මාසෙ මුල පින්ලන්තෙට ආවා.දැනට ඉතින් වාසදේසය පින්ලන්තයේ අගනුවර හෙල්සින්කි දිහාවේ තමා.තාම ඇවිල්ල සති දෙකයි.මේ සති දෙකට ගොඩක් අලුත් අත්දැකීම් ලැබුවා.ඒ අතරින් එකක් ගැනයි මේ ලියන්නේ.
මම ආසම ජාති දෙකක් ගැන මගේ යාළුවෝ දන්නවා.ආන්න එයින් එකක් මෙහේ හරිම සුලභයි.ඕන තරම් හොයාගන්න තියනවා.අනිත් එක අර තරම්ම නැතිවුනත් හොයාගන්න තියනවා.හැබැයි ටිකක් ගනන්.කොච්චර ගනන්ද කිව්වොත් මුළු යුරෝපෙන්ම සාපේක්ශව ගණන් වැඩි මෙහේලු.ඕක මම කලින් දැනගෙන හිටියේ නෑ සිරාවට.ගනන් වැඩි හොයාගන්න අපහසු එක ගැන කියන්න කලින් හොයාගන්න ලේසි දේ ගැන කියල හිටින්නම්කෝ....
ඒ තමයි පොත්....
පොත් පිස්සුව කොච්චරද කියනවනම් මෙහේ ඇවිල්ල දෙවෙනි දවසෙම Second Hand shop එකක තිබිලා Agatha Christy ගේ A murder is announced පොත ගත්තා.මෙහේ Second hand shop කියන්නේ පොත් විතරක් නෙවෙයි.ලී බඩු , විදුලි උපකරණ , ඇදුම් ආයිත්තම් , පොත් , DVD එකී මෙකී නොකී සියල්ලම වගේ තියෙනවා.ඒව ගැන වෙනම ලියන්න ඕන.රයිටෝ...නැවතත් මාත්තුරුකාවට එමු.පොත්... මෙහේ භාශාව Finnish නෙ.හැබැයි Finnish බැරිනම් ෆිනිශ් වෙන්නෙනම් නෑ.මොකද මෙහේ අයට (හෙල්සින්කි) English නුත් පුලුවන්.පොත්කඩ වැහිවැහැලා ගානට ඇති නමුත් අදෝමැයි English පොතපතනම් ඉතා අඩුයි තමා මම දැනට දෑක්ක විදිහට වැඩියෙන් තියෙන්නෙ Finnish භාශාවෙන් ලියවුනු පොත්.ප්‍රසිද්ධ English පොත් ගොඩාක්ම Finnish වලට පරිවර්තනය වෙලාත් තියනවා දැක්කා.කෝමින් කෝමහරි මේ සති දෙකට English පොත් තුන හතරක් ගත්තා.අපි ඉතින් මෙහේ ස්ථිර පදිංචිකාරයො නෙවෙයිනෙ ආයුබොවන්ඩ.ඒක නිසා ඉන්න තැන කාරිය වැඩිය පොතපත ගොඩගහගන්න ඉඩක් නැතුවා.අලුතින් පොත පත ගන්න ඕනවට වඩා බජෙට්ටුවෙන් මුදල් වෙන්කරන්නත් මුදල් ඇමැතිනිය අකමැති වෙච්චි මේ පුරවැසියා කුමක් කරම්දැයි කල්පනා කරන්නේය...
එකල්හි යටගිය දවස සිරිලකැ රුහුණු දේසයේ මාතර පුරවරයේ පුස්තකාලන්හි කාලය ගතකල බව මේ මානවකයාගේ සිහියට නැගෙනේයැ.හෙතෙම එළඹි සිහියෙන් යුතුව අන්තර්ජාලය පිරික්සැන්නේ පින්ලන්තයේ හෙල්සින්කි අගනුවරදැ පුස්තකාල 37 ක් ඇතිබවත් එම පුස්තකාල එකම ජාලයක් බවත් දැනගන්නේය.තවදුරටත් පවත්නම් මෙසේයැ...
පුස්තලකාල වලින් ලොකුම එක හෙල්සින්කි වල පිහිටලා තිබුනට අපේ ගමෙත් (ඇවිල්ල සති දෙකට අපේ ගම වුන හැටි....) එක පුස්තකාලයක් තියෙනවා කියලා දැනගත්‍තා.ගෙදර ඉදල මීටර් 500 යි.අද දවල් කෝල් එකක් දීලා විස්තර ඇහුවා.බොරු කියන්න ඕන නැහැනෙ.ඉස්සෙල්ලම ඇහුවෙ English පොත් තියනවද කියලා.නැත්නම් ඉතින් රූපපොත් විතරනේ බලන්න වෙන්නේ.පලවෙනි ප්‍රශ්නෙට උත්තරේ ඔව් වුන නිසා දෙවෙනි ප්‍රශ්නේ ඇහුවා.කීය වෙනකල් පුස්තකාලේ විවෘතද කියලා.රෑ 8 වෙනකල් ඉන්නවයි කියල කිව්වෙ ඔය බොලන්.මෙහේ මේ කාලෙට ඉර බහින්නේ රෑ නමයහමාරට විතර නිසාද දන්නේනම් නෑ.
ඉතින් අද හැන්දෑවරුවේ 7ට විතර පුස්තකාලෙට ගියා.ගියපු ගමන් ගමරාල සිල්ගත්තා වගේ වැට අයිනටවෙලා නෙවෙයි පලවෙනි පොත් රාක්කේ ගාවට වෙලා ඉන්නකොට පුස්තකාලෙ ලොකුමිස් ඇවිත් ඇහුවා මොකෝ මේ බැහෑරක්ද කියලා.දැන් තොපි හිනාවෙන්න එපා.ඒ මනුස්සයා එහෙම තමා ඇහුවේ.පොත් බැහැර දෙනවට කියන්නේ Lending කියලානේ.ඉතින් මම ඔව් කිව්වට පස්සෙ මගේ මෙහේ අයිඩෙන්ටිය අරගෙන මගේ විස්තර පුරවගෙන Library Card එකක් දුන්නා.ඒක තමයි ඔය තැබිලි පාටට පින්තූරේ තියෙන්නෙ.ඊට පස්සෙ මාව English පොත් තියන තැනට එක්කගෙන ගිහිල්ලා විස්තර කියලා දුන්නා.බැහැර ගෙනියන පොතක් මාසයක් තියාගන්න පුලුවන්.වැඩි ඉල්ලුමක් තියෙන අලුත් පොත්නම් සතිදෙකයි.පොත්වලට අමතරව චිත්‍රපටි සහ සංගීත තැටිත් බැහැර ගෙනියන්න පුලුවන්.පරිගණක පහසුකම් තියෙනවා අධ්‍යයන කටයුතු වලට.මම යන වෙලාවෙත් පොඩි එවුන් 10ක් විතර පොත් කියවන ගමන් සහ පරිගණකවල වෑඩ කරනගමන් හිටියා.ගේම් ගහගහ නම් නෙවෙයි.අධ්‍යාපන වැඩ කටයුතු.මේ කිසිදු දේකට අයකිරීමක් නම් නෑ.ඔක්කොම නොමිලේ.මෑතක් වෙනකල් ඡායාපිටපත් සහ Printout නොමිලේ සැපයූවත් ඒකට පමණක් දෑනට මුදලක් අයකරනවා කියලා එයාලගේ Web එකේ තිබ්බා.Web එකෙන් මම බැහැර ගෙනියපු පොත් ගැන වගේම අවශ්‍ය පොත් තියෙන Library එක හොයාගන්නත් පුලුවන්ලු.කාඩ් එක ගත්තෙ ගමේ පුස්තකාලෙන් වුනාට අර මම කලින් කිව්ව පුස්තකාල 37න් ඕනම එකක පොත් ගන්න පුලුවන් කිව්වා.ඒකත් හොදයි මොකද ගමේ පුස්තකාලේ ලොකු English පොත් එකතුවක්නම් නෑ.අල්ලපු ගමේ පුස්තකාලේත් බලන්න නැත්නම් Helsinki ලොකු පුස්තකාලෙට යන්න කියලා ගමේ පුස්තකාලේ මිස් කිව්වා.දැනට ඔහොමයි තොරණේ විස්තරේ.පින්තුරෙ තියෙන්නෙ අද අරගෙන ආපු පොත.දැන් ඉතින් කියවන්නයි ලේස්තිය....
ආ...හෝව් හෝව් පොඩ්ඩක්.අර මම කලින් කැමතිම කිව්ව ඒත් මෙහේ ගණන් දේ ගැනත් වචනයක් ලියල මේක ඉවරකරන්නම්.නැත්නම් මගේ රත්‍තරන් යාළුවො ටික හෙට උදේ වෙද්දි මේක මඩවලා තියෙයි.
ඒ හොයාගන්න අමාරු දේ තමා බන් අරක්කු....ඒව මෙහේ ගිණිගනන් ඕයි.....
එහෙමනම් ගෙහුන් එන්නම්.
nähdään myöhemmin ( මේ ලියලා තියෙන්නෙත් English වලින්නම් ගෙහුන් එන්නම් කියලා සිංහලෙන්නම් See you later කියලා)
 |
